Read Batak Simalungun PSALMEN 49 Bible Online

PSALMEN 49 - Batak Simalungun bible

PSALMEN 49

¹Bani pambobai koor. Humbani ginompar ni si Korah. Sada Psalm.

²Tangihon ma on, ale sagala bangsa, pardiateihon ma, nasiam ganup isi ni dunia on, [600]

³age na sombuh, sonai na sangap, age na bayak sonai na musil haganup,

⁴sihol hatahonon ni pamanganku do hauhuron, anjaha hapentaran do pingkiran ni uhurhu.

⁵Tarehononku do pinggolhu dompak umpama, anjaha patalaronku ma rusiangku marhitei husapi. [601]

⁶Mase ma pala mabiar ahu bani ari hasunsahan, sanggah hajahaton ni halak na mardakdak ahu manginggoti ahu. [602]

⁷ai ma na martenger ni uhur bani na dong bani, anjaha na mangenjengkon habayakon ni sidea? [603]

⁸Tongon, ise pe lang na boi manobus dirini, barang targalarisi partobusni bani Naibata, [604]

⁹ai hargatu do partobus ni tonduyni ai, anjaha seng targoki sadokah ni dokahni, [605]

¹⁰ase boi ia tongtong manggoluh, anjaha seng mangidah tanoman.

¹¹Nai ma, idahonni do, matei do age halak na maruhur, na lontong pakon na jijing pe maseda do rombang, anjaha na dong bani sidea tading bani na legan. [606]

¹²Tanoman do rumah ni sidea lalab, ianan ni sidea marsundut-sundut, age pe marpanggorani hubani sidea tanoh in.

¹³Ia jolma in, ibagas hasangaponni, seng totap, usih songon pinahan do sidea iboiskon. [607]

¹⁴Ai ma na mangonai bani halak na mangunsagah bani dirini, ai ma ujung ni halak na marosuh bani buei ni sahapni sandiri. Sela.

¹⁵Songon biribiri do sidea ipaharang hu nagori toruh, hamatean do na marmahan sidea; torus do sidea turun hu tanoman, malantur angkula ni sidea; nagori toruh do gabe ianan bani sidea. [608]

¹⁶Tapi Naibata do na manobus tonduyhu humbani kuasa ni nagori toruh. Tongon, Ia do na mandokdok ahu. Sela. [609]

¹⁷Ulang rusak ho anggo lambin bayak sada halak, anggo lambin martambah hamuliaon ibagas rumahni, [610]

¹⁸ai bani parmateini holi seng boanonni ai, anjaha hamuliaonni seng tuad mangirikkonsi. [611]

¹⁹Age pe nini uhurni, sanggah goluhni sangap ia, age dapotan puji-pujian sada halak halani mardohar ia, [612]

²⁰maningon parayakonni do ompung-ompungni, na so mangidah haliharon be sadokah ni dokahni. [613]

²¹Jolma ibagas hasangaponni, tapi lang maruhur, usih do ia songon pinahan siraseihononkon. [614]