Read Batak Simalungun PSALMEN 5 Bible Online

PSALMEN 5 - Batak Simalungun bible

PSALMEN 5

¹Bani pambobai koor. Marhasoman tulila. Psalm ni si Daud.

²Sai tangihon Ham ma hatangku, Ham Jahowa, anjaha pardiateihon Ham ma hoih-hoih ni uhurhu. [35]

³Tangihon Ham ma dilo-dilongku Ham Rajangku anjaha Naibatangku, ai hu Bamu do ahu martonggo. [36]

⁴Ham Jahowa, girah sogod do itangihon Ham sorangku, girah sogod do ahu marugas marayak Ham anjaha manatap-natap. [37]

⁵Ai sedo Naibata na mangkarosuhkon hagedukon ia Ham, seng boi tondok paruhur na geduk i lambung-Mu. [38]

⁶Seng tahan sigijang uhur i lobei ni panonggor-Mu, sogam do uhur-Mu bani sagala sihorjahon hajahaton. [39]

⁷Iparseda Ham do sagala halak sisahapkon ladung, ihagigihon Ham do siduruskon daroh pakon panipu. [40]

⁸Tapi anggo ahu, halani banggal ni idop ni uhur-Mu, sai masukanku do rumah-Mu, manrogop do ahu dompak rumah-Mu na pansing in, marhasoman biar Bamu. [41]

⁹Ham Jahowa, togu Ham ma ahu ibagas hapintoron-Mu, halani imbang-imbangku, pahornop Ham ma dalan-Mu i lobeihu. [42]

¹⁰Ai seng dong na sintong ibagas pamangan ni sidea, na ilat do pingkiranni ibagas, songon tanoman na tanggak do tolonan ni sidea, ipalandit-landit do dilahni. [43]

¹¹Salahkon Ham ma sidea, Ham Naibata, sai madabuh ma sidea halani tahi-tahi ni sidea, ambukkon Ham ma sidea halani buei ni panlanggaronni, ai dompak Ham do sidea manlawan. [44]

¹²Tapi sai na marmegah-megah do sagala na marlingod Bamu, marolob-olob do sidea sadokah ni dokahni, halani Ham do parlingodan bani sidea. Sai marolob-olob do ibagas Ham na mangkaholongi goran-Mu. [45]

¹³Ai Ham do Jahowa na mamasu-masu na pintor maruhur; iliotkon Ham do idop ni uhur-Mu hubani sidea songon gantar. [46]