Read Batak Simalungun PSALMEN 50 Bible Online

PSALMEN 50 - Batak Simalungun bible

PSALMEN 50

¹Psalm ni si Asap. Naibata, Naibata Jahowa marsahap anjaha mardilo bani tanoh on, humbani hapoltakan das hu hasundutan. [615]

²Hun Sion, pakpak ni hajengeson, marsinalsal Naibata. [616]

³Na roh ma Naibatanta anjaha seng sip Ia, apuy na margajag-gajag do i lobei-Ni, anjaha haba-haba na gogoh manlioti-Si. [617]

⁴Idilo do langit na i babou, sonai tanoh laho manguhumi bangsa-Ni, [618]

⁵“Pahumpul ma Bangku halak na Huhaholongi, na mambahen parpadanan Bangku marhitei galangan.” [619]

⁶Langit mambaritahon hapintoron-Ni, ai Naibata sandiri do panguhum. [620]

⁷Tangihon ma, ale bangsang-Ku, ase marsahap Ahu; ale Israel, sihol saksihonon-Ku do bannima, “Naibata, Naibatamu do Ahu.” [621]

⁸Sedo halani galangan sisayatonmu ase Hupinsang ho; galangan situtungonmu tongtong do i lobei-Hu. [622]

⁹Seng porlu buaton-Ku lombu hun rumahmu atap hambing tunggal humbani harang ni pinahanmu,

¹⁰ai Ahu do simada binatang na i harangan, pinahan na marribu-ribu na adong i atas dolog.

¹¹Hutanda do sagala manuk-manuk na i awang-awang, anjaha saguru Bangku do sagala na manggulmit i talun.

¹²Porini pe loheian Ahu, seng pala hatahonon-Ku bam, ai gok Bangku do dunia on ampa sagala isini. [623]

¹³Mintor panganon-Ku ma nani daging ni lombu jonggi, atap inumon-Ku ma daroh ni hambing tunggal?

¹⁴ Galangkon ma banggal ni uhur bani Naibata, anjaha galari ma bagah-bagahmu bani Sitimbulan in; [624]

¹⁵ anjaha dilo ma Ahu bani ari hasosakan, ase Hupaluah ho anjaha ipuji ho Ahu. [625]

¹⁶Tapi bani parjahat ihatahon Naibata do, “Aha do hakmu pajojorhon titah-Ku, anjaha manobut-nobut padan-Ku marhitei babahmu? [626]

¹⁷Hape ho do mangkagigihon sipaingat, anjaha ho do manundali hatang-Ku! [627]

¹⁸Anggo ididah ho panangko, marosuh do ho mangkasomanisi, anjaha sapanriah do ho rap pakon parbangkis. [628]

¹⁹Ipalopas ho do pamanganmu mansahapkon hajahaton, ampa dilahmu mandandan panipuon.

²⁰Sai hundul-hundul do ho mangkatai saninamu, sai ipahiri ho do anak ni inangmu.

²¹Sonai do ibahen ho, tapi sai sip do Ahu; jadi iagan ho doskon ho Ahu. Ahu do manguhum ho anjaha patidakon-Ku ma ai i lobei ni matamu. [629]

²²Parimbagaskon ma ai, ale sihalupahon Naibata, ase ulang roh Ahu manoroh, gabe ise pe lang boi paluahkon. [630]

²³ Ise na manggalangkon banggal ni uhur, ai do na pasangapkon Ahu, anjaha ise na mardalan ibagas hapintoron, hubani do patalaron-Ku hatuahon-Ku.” [631]