Read Batak Simalungun PSALMEN 51 Bible Online

PSALMEN 51 - Batak Simalungun bible

PSALMEN 51

¹Bani pambobai koor. Psalm humbani si Daud.

²Sanggah na roh Nabi Natan mangayakisi, dob idohori si Batseba. (2 Sam. 12)

³Maidop ma uhur-Mu bangku, Ham Naibata, romban hubani dear ni layak-Mu, sasap Ham ma panlanggaronku romban hubani buei ni idop ni uhur-Mu. [632]

⁴Burihi Ham ma ahu pansing tumang humbani hajahatonku, anjaha paborsih Ham ma ahu humbani dousangku.

⁵Ai mangahap do ahu bani panlanggaronku, anjaha tongtong do sonson i lobeihu dousangku. [633]

⁶Bamu, Bamu tumang do ahu mardousa, anjaha na jahat bani panonggor-Mu do huhorjahon, ase taridah pintor do Ham bani parsahap-Mu, anjaha pitah Ham bani panguhumion-Mu. [634]

⁷Tongon, ibagas hagedukon do ahu tubuh, anjaha ibagas dousa ijalo inang ahu. [635]

⁸Tongon, hasintongan na ibagas uhur do iharosuhkon Ham, anjaha ibagas na ponop ipabotohkon Ham hauhuron bangku. [636]

⁹Uras Ham ma ahu humbani dousangku marhitei hisop, ase borsih ahu, burihi Ham ma ahu, ase lopakkan ahu marimbang salju. [637]

¹⁰Sai pabogeihon Ham ma hu bangku malas ni uhur pakon hamegahon, ase marolob-olob holi-holi na dob nirosakan-Mu. [638]

¹¹Ponopkon Ham ma bohi-Mu humbani dousangku, anjaha sasap Ham ma ganup hajahatonku.

¹²Tompa Ham ma uhur na borsih ibagas diringku, Ham Naibata, anjaha bere Ham ma bangku tonduy na baru anjaha na totap. [639]

¹³Ulang ma pabali Ham ahu hun lobei-Mu, anjaha ulang ma buat Ham Tonduy-Mu Na Pansing in humbangku. [640]

¹⁴Pasuang Ham ma bangku malas ni uhur halani pangurupion-Mu, anjaha tungkoli Ham ma ahu marhitei tonduy pambalosion.

¹⁵Ase huajarhon dalan-Mu bani sipanlanggar, ase mulak halak pardousa hu Bamu. [641]

¹⁶Sai paluah Ham ma ahu humbani sapata ni daroh, Ham Naibata, Naibata ni hatuahonku, ase ipuji dilahku hapintoron-Mu. [642]

¹⁷Buha Ham ma bibirhu, Ham Tuhan, ase iambilankon pamanganku puji-pujian-Mu.

¹⁸Ai seng iharosuhkon Ham galangan sisayaton, anjaha porini huboban galangan situtungon, seng anjai hadearhonon-Mu ai. [643]

¹⁹Galangan na hinarosuhkon ni Naibata, ai ma tonduy na marosak; uhur na maropuk anjaha na marosak seng itulak uhur-Mu, Ham Naibata. [644]

²⁰Bahen Ham ma na madear hu Sion romban hubani idop ni uhur-Mu, pauli Ham ma tembok ni Jerusalem. [645]

²¹Jadi ijai ma harosuhkonon-Mu galangan na sintong, galangan situtungon ampa galangan sirasogon; ijai ma galangonkon lombu jonggi i atas anjapanjap-Mu. [646]