Read Batak Simalungun PSALMEN 55 Bible Online

PSALMEN 55 - Batak Simalungun bible

PSALMEN 55

¹Bani pambobai koor. Doding podah humbani si Daud marhasoman husapi.

²Tangihon Ham ma tonggongku, Ham Naibata, anjaha ulang ma tulak Ham elek-elekku. [661]

³Ingat Ham ma ahu anjaha balosi Ham ma; mawat-awat do ahu ibagas doruh-doruhku.

⁴Bulinsah do ahu halani parsurak ni munsuh, halani panosak ni parjahat; ai sai manggulang hamagouan do sidea bangku, anjaha ibagas gila do sidea mammunsuhi ahu. [662]

⁵Mangirput do uhurhu ibagas, anjaha songgot-songgot ni hamatean mandorab ahu. [663]

⁶Biar pakon hagobiron do manrohi ahu, anjaha hasonggoton manrungkub ahu, [664]

⁷pala huhatahon, “Ah, ambit marhabong ma ahu songon asas, habang ma ahu mayap-ayap mangindahi parsaranan.” [665]

⁸Tongon, daoh ma ahu maporus, marborngin i halimisan. Sela. [666]

⁹Tarolos ma ahu mangindahi ianan parlingodan, dompak logou sibungkar hasowor ampa haba-haba.

¹⁰Geori Ham ma sidea Tuhan, bolah Ham ma riah ni sidea. Ai huidah do paksa pakon parsalisihan ibagas huta ai. [667]

¹¹Arian pakon borngin manrunda sidea i atas tembokni; hajahaton ampa hasunsahan masa ibagas ai.

¹²Hasamboron do i tongah-tongahni, anjaha seng misir humbani alamanni panokohon pakon panipuon.

¹³Sedo munsuh na pahiri ahu, ambit ai hutaron namin; sedo halak pardomdom na roh mangimbang ahu, ambit ai marponop ahu hun lobeini.

¹⁴Tapi ho do, jolma na doskon ahu, huan-kuanku, hatengeran ni uhurhu; [668]

¹⁵ho, hasomanku saparsaoran, ho, hasomanku saodoran hu rumah ni Naibata. [669]

¹⁶Sai hamatean ma mandorab sidea, manggoluh ma sidea susur hu nagori toruh; ai hajahaton do manggoki rumah ampa paruhuron ni sidea. [670]

¹⁷Tapi anggo ahu, bani Naibata do ahu dilo-dilo. Jadi Jahowa ma na paluahkon ahu.

¹⁸Bodari, sogod ampa tongah arian dilo-dilo do ahu, doruh-doruh, anjaha itangihon do sorangku. [671]

¹⁹Paluahon-Ni do tonduyhu mardamei-damei humbani halak na mandorab ahu, ai buei tumang do sidea na manlawan ahu.

²⁰Sai tangaron ni Naibata do anjaha patoruhon-Ni do sidea; Ia na marparatas humbani nabasaia. Sela. Halani seng ra sidea paubahkon uhurni, anjaha seng marhabiaran sidea bani Naibata. [672]

²¹Ilaluhon do tanganni laho mangimbang hasomanni, mangeluk do ia humbani parpadanan.

²²Landitan do pamanganni humbani mantega, tapi hamunsuhon do ibagas uhurni; lamlaman do hatani ase minak, tapi songon podang na sinintak do sidea. [673]

²³ Ompaskon ma bani Jahowa holsoh ni uhurmu, jadi Ia ma na mansarihon ho; seng anjai paturuton-Ni halak parpintor marhasunsahan lalab. [674]

²⁴Tapi anggo Ham, ale Naibata, sai patuadon-Mu do sidea hubagas godung hamagouan; halak sionsop daroh pakon panipu seng anjai das ronsi partongahan ni umurni. Tapi anggo ahu hu Bamu do marhatengeran. [675]