Read Batak Simalungun PSALMEN 57 Bible Online

PSALMEN 57 - Batak Simalungun bible

PSALMEN 57

¹Bani pambobai koor. Inggouni: Ulang parseda. Doding podah humbani si Daud. Sanggah lintun ia humbani si Saul, hubagas liang. [686]

²Maidop ma uhur-Mu bangku, Ham Naibata, maidop ma uhur-Mu bangku: ai Bamu do marlingod tonduyhu, anjaha bani linggom ni habong-Mu do ahu marlingod, paima salpu parmaraan. [687]

³Dilo-dilo do ahu bani Naibata na timbul in, hubani Naibata siluluhon ahu.

⁴Marsuruhan do Ia hun nagori atas anjaha paluahon-Ni do ahu; pabadoron-Ni do halak na sihol mangatah ahu. Sela. Sai tongoson ni Naibata do idop ni uhur-Ni ampa hasintongan-Ni. [688]

⁵Tibal do ahu i tongah-tongah ni singa, na sihol mangatah anak ni jolma; iponni doskon tanja ampa panah, anjaha dilahni songon podang na niasah. [689]

⁶ Pagijang Ham ma diri-Mu, Ham Naibata, hu atas ni sagala langit, anjaha hu sab tanoh on hamuliaon-Mu. [690]

⁷Itaon sidea do jarot bani langkah-langkahku, anjaha tonduyhu domma unduk; ihurak sidea sada godung i lobeihu, tapi sidea sandiri do madabuh hubagas. Sela. [691]

⁸Sonang do uhurhu, Ham Naibata, sonang do uhurhu; sihol do ahu mandoding, sihol do ahu mamuji-muji. [692]

⁹Puho ma ale tonduyhu, puho ma arbap pakon husapi; sihol do puhoanku buha siang.

¹⁰Pujionku ma Ham i tongah-tongah ni sagala bangsa, ale Tuhan, dodingkononku ma Ham i tongah-tongah ni sagala marga, [693]

¹¹ ai sundol do hu langit idop ni uhur-Mu, anjaha hasintongan-Mu das hu awang-awang. [694]

¹² Pagijang Ham ma diri-Mu, Ham Naibata, hu atas ni sagala langit; hu sab tanoh on hamuliaon-Mu. [695]