Read Batak Simalungun PSALMEN 58 Bible Online

PSALMEN 58 - Batak Simalungun bible

PSALMEN 58

¹Bani pambobai koor. Inggouni: Ulang parseda. Doding podah humbani si Daud.

²Tongon do nani domu hubani uhum hanima marsahap, ale siparkuasa, anjaha sintong-sintong do iuhumi hanima anak ni jolma in? [696]

³Lang, hajahaton do idalankon hanima ibagas uhurnima, anjaha igoki hanima tanoh in bani paksa.

⁴Domma manlembang halak parjahat humbani partubuhni nari, domma kahou humbani partapaan nari halak sihatahon ladung. [697]

⁵Bisa na dong bani sidea, doskon bisa ni ulog, anjaha usih do sidea songon ulog darih na nengel, na mamitut pinggolni, [698]

⁶na so manangihon sora ni sipanubut, sora ni sipanabas na pandei. [699]

⁷Ham Naibata, ropangi Ham ma ipon ni sidea ibagas babahni, rosaki Ham ma ngadol ni anak ni singa, Ham Jahowa.

⁸Sai salpu ma sidea songon bah na laho horah; sai melus ma sidea songon poyon na i topi dalan. [700]

⁹Sai mahansur ma sidea songon langkitang na manjulur, songon rudang na masabur bani sada naboru seng sompat mangidah mata ni ari. [701]

¹⁰Lape milas hudon ni sidea ibahen apuy ni duri-duri, na matah atap na masak, domma ipurpurhon Naibata sidea.

¹¹Marmalas ni uhur ma halak parpintor, mangidah pambalason ai; burihanni ma naheini ibagas daroh ni parjahat. [702]

¹²Jadi hatahonon ni jolma ma, “Dapotan upah do tongon parpintor, tongon, dong do Naibata na manguhum i atas tanoh on.” [703]