Read Batak Simalungun PSALMEN 59 Bible Online

PSALMEN 59 - Batak Simalungun bible

PSALMEN 59

¹Bani pambobai koor. Inggouni: Ulang parseda. Doding podah humbani si Daud, sanggah isuruh si Saul ia manjaga rumahni laho mamunuhsi. [704]

²Paluah Ham ma ahu humbani munsuhku, Ham Naibata; ondingi Ham ma ahu marimbang sagala imbangku.

³Paluah Ham ma ahu humbani sihorjahon hajahaton, anjaha paluah Ham ma ahu humbani siduruskon daroh.

⁴Ai tonggor ma, iuhurhon sidea do goluhku; halak siparkuasa mandorab ahu, age pe seng dong panlanggaronku, seng dong dousangku, Ham Jahowa.

⁵Age pe seng marsalah ahu, roh do sidea mandorab domma sirsir bei. Hehe ma Ham manjumpahkon ahu anjaha kawah ma Ham! [705]

⁶Ham Jahowa, Naibata Zebaot, Naibata ni Israel! Hehe ma Ham marlulu bani bangsa parbegu! Ulang ma maidop Ham dompak halak partahi-tahi na jahat in. Sela.

⁷Mulak do sidea ganup bodari, mangorongi songon baliang, iinggoti sidea do huta in. [706]

⁸Tonggor ma, buei do sahap-sahap ni babahni; podang do longkot bani dilahni, ise ma na patangi-tangi ai! [707]

⁹Tapi Ham Jahowa, tartawa do Ham mangidah sidea, mapas do Ham mangidah sipajuh begu-begu ganup. [708]

¹⁰Ham Pargogohku, hu Bamu do ahu mangkawah, ai Ham do Naibata, batar-batar bangku.

¹¹Naibatangku paridop ni uhur, in do na mangalo-alo ahu; Naibata do mambahen marmalas ni uhur ahu mangidah imbang-imbangku. [709]

¹²Ulang ma mintor bunuh Ham sidea, Ase ulang lupa bangsangku; pamerap Ham ma sidea marhitei hagogohon-Mu, dob ai tompaskon Ham ma sidea, Ham Tuhannami, gantarnami. [710]

¹³Halani dousa ni pamanganni, sahap-sahap ni bibirni, bahen Ham ma sidea tardapot ibagas hatoalonni, halani pamuraion pakon ladung, na hinatahonni. [711]

¹⁴Boiskon Ham ma sidea ibagas ringis-Mu, boiskon Ham ma sidea, ronsi lang dong be sidea, ase ibotoh halak, Naibata do hape na manggomgom Jakob, das hu ujung ni tanoh on. Sela.

¹⁵Mulak do sidea ganup bodari, mangorongi songon baliang, iinggoti sidea do huta in. [712]

¹⁶Maor-aor do sidea mangindahi sipanganon, marmungut-mungut, anggo lang bosur sidea.

¹⁷Tapi anggo ahu sai dodingkononku do hagogohon-Mu, janah olobkononku do sogod idop ni uhur-Mu; ai Ham do batar-batar anjaha haporusanku sanggah tarsosak. [713]

¹⁸Ham pargogohku, Ham do dodingkononku, Ham do Naibata batar-batar bangku, Naibatangku na maridop ni uhur bangku.