Read Batak Simalungun PSALMEN 60 Bible Online

PSALMEN 60 - Batak Simalungun bible

PSALMEN 60

¹Bani pambobai koor. Inggouni: Silundat. Hasaksian. Doding podah humbani si Daud,

²sanggah na marmunsuh ia dompak halak Aram na hun Mesopotamia pakon halak Aram na hun Soba, sanggah na mulak si Joab anjaha italuhon halak Edom i pamah pargaraman, sapuluh dua ribu halak bueini. [714]

³Ham Naibata, domma itulakkon Ham hanami anjaha ilontas Ham partahanannami. Domma igilai Ham hanami, sai suang ma use bahen Ham hanami.

⁴Domma dugur ibahen Ham tanoh in anjaha mabolah, padear Ham ma bolah-bolahni in, ai domma mambal-ambal in. [715]

⁵Domma ipaidahkon Ham na majangin bani bangsa-Mu, domma ipainumkon Ham bennami anggur na pamabukkon. [716]

⁶Domma ibere Ham bani sidea, na marhabiaran Bamu, sada tanda, parbansahan bani sidea dompak sior. Sela. [717] [718]

⁷Ase boi maluah na hinaholongan-Mu, paluah Ham ma marhitei tangan siamun-Mu, anjaha balosi Ham ma hanami.

⁸Domma marsahap Naibata ibagas rumah-Ni na ma pansing! Marhasoman surak-surak sihol do bagion-Ku Sikem anjaha sibaron-Ku pamah Sukot. [719]

⁹Ahu do simada Gilead, Manase pe Ahu do simadasi; Efraim ai ma tudung ni ulung-Ku, anjaha Juda tungkot ni harajaon-Ku; [720]

¹⁰Moab do mangkuk parburihan Bangku, anjaha hu Edom Husampakkon sipatung-Ku; marsurak hamonangan do Ahu pasal Palistim.

¹¹Ise ma nani na mamboan Ahu hu huta na toguh ai, ise ma na manogu Ahu das hu Edom? [721]

¹²Ai lang domma itulak Ham hanami, ale Naibata, anjaha seng ra Ham, ale Naibata, mangkasomani balanami? [722]

¹³Sai bere Ham ma partolongan bennami dompak imbangnami, ai sisoya-soya do partolongan ni jolma. [723]

¹⁴Marhasoman Naibata tardalankon hita do horja habanggalon, anjaha Ia sandiri do na manrojati imbangta. [724]