Read Batak Simalungun PSALMEN 63 Bible Online

PSALMEN 63 - Batak Simalungun bible

PSALMEN 63

¹Psalm ni si Daud sanggah i halimisan Juda ia. [744]

²Ale Naibata, Ham do Naibatangku, na hupindahi, horahan do tonduyhu Bamu, siholan do dagingku Bamu songon tanoh na dorging anjaha na horah, na so marbah. [745]

³Sonai do i rumah-Mu na pansing in mangkawah ahu Bamu, sihol mangidah hagogohon-Mu ampa hamuliaon-Mu. [746]

⁴Ai idop ni uhur-Mu dearan do ai ase hagoluhan; sai pujion ni bibirhu do Ham.

⁵Sonai ma, sihol do pujionku Ham sadokah ahu manggoluh, marhitei goran-Mu hupaherbang do tanganku dompak datas. [747]

⁶Bosur do tonduyhu songon pambahen ni taboh-taboh ampa utok-utok ni holi-holi, marhitei bibir na marolob-olob mamuji-muji pamanganku. [748]

⁷Sanggah hudingat Ham bani podomanku, marpingkir-pingkir pasal Ham sadokah runda borngin,

⁸Ham do pangurupi bangku ijai, anjaha tarbahen ahu marolob-olob ibagas linggom ni habong-Mu. [749]

⁹Sai longkot do uhurhu Bamu, tangan-Mu siamun do na manjolom ahu. [750]

¹⁰Tapi anggo sidea na manguhurhon hosahku, sai turun do sidea hu nagori toruh. [751]

¹¹Ondoskonon do sidea bani mata ni podang, gabe panganon ni sorigala do sidea.

¹²Tapi raja in marmalas ni uhur do ibagas Naibata; Marolob-olob do sagala na marbulawan hu Bani, ai sipasipon do babah ni halak sihatahon ladung. [752]