Read Batak Simalungun PSALMEN 65 Bible Online

PSALMEN 65 - Batak Simalungun bible

PSALMEN 65

¹Bani pambobai koor. Psalm ni si Daud. Sada doding.

²Ham do na patut sipujion, ale Naibata, i Sion, anjaha Bamu do sigalaron bagah-bagah. [761]

³Ham sitangihon tonggo, Bamu do roh sagala na manggoluh. [762]

⁴Hasalahan do na manrungkub ahu; panlanggaronnami Ham do na manasap in. [763]

⁵Martuah ma halak na pinilih-Mu, na pinalopas-Mu roh dohor marianan i alaman-Mu. Sai bosur ma hanami ibahen hinadear ni rumah-Mu, rumah-Mu na pansing in. [764]

⁶Marhatunggungon, domu hubani hapintoron, ibalosi Ham do hanami, ale Naibata ni hatuahonnami, hatengeran ni sagala ujung ni tanoh on pakon laut na madaoh, [765]

⁷na pajonamkon sagala dolog marhitei hagogohonni, na margonditkon hagogohon, [766]

⁸na mambahen laut minop ampa parhasak ni gilumbangni, sonai homa halutuon ni bangsa-bangsa. [767]

⁹Jadi mabiar ma halak na i ujung ni tanoh on mangidah halongangan-Mu, anjaha hapoltakan ampa hasundutan marolob-olob do ibahen Ham. [768]

¹⁰Itohu Ham do tanoh in, anjaha marbah ibahen Ham, Ham do na mambahen bayak nornor in. Gok bah do bah tubuh ni Naibata, Ham do na pasirsir omei bani sidea. Tongon, sonon ma ibahen Ham pasirsirhonsi: [769]

¹¹Ham do na mangarbahi paninggalaanni, Ham do na manlumati olbakni. Ham do pagaburhon ai marhitei bah udan, anjaha Ham do na mamasu-masu suan-suananni. [770]

¹²Ham do na mansortalii partahunan marhitei dear layak-Mu, manektekkon minak do sagala bokas-Mu; [771]

¹³mombur do sampalan na i pamah, anjaha raboyon margonditkon olob-olob; [772]

¹⁴marpakeian hulanan ni biribiri do sompalan, habungan-habungan marhiouhon omei; marsurak-surak do sidea, mandoding-doding tene.