Read Batak Simalungun PSALMEN 66 Bible Online

PSALMEN 66 - Batak Simalungun bible

PSALMEN 66

¹Bani pambobai koor. Sada Psalm. Sada doding. Marolob-olob ma bani Naibata, nasiam haganup tanoh on.

²Dodingkon nasiam ma hamuliaon ni goran-Ni; sombahkon nasiam ma Bani puji-pujian na marmulia.

³Hatahon nasiam ma bani Naibata, “Banggalni in sagala horja-Mu! Pangkorhon ni timbul ni hagogohon-Mu, ningon do marsombah hu Bamu sagala munsuh-Mu. [773]

⁴Ganup tanoh on marsombah do hu Bamu, sai dodingkononni do Ham, dodingkononni do goran-Mu. Sela.”

⁵Roh anjaha tonggor nasiam ma pambahenan ni Naibata; gok kuasa do pambahenan-Ni dompak anak ni jolma. [774]

⁶Ipaubah do laut gabe na horah, mardalan nahei sidea mandipari bah mardalan; ijai marmalas ni uhur do hita marhiteihon-Si, [775]

⁷na manrajai tongtong marhitei hagogohon-Ni, na mangkawahkon sagala bangsa marhitei panonggor-Ni, ase ulang mangenjeng halak panggeori. Sela. [776]

⁸Puji ma, ale sagala bangsa, Naibatanami, pabogeihon nasiam ma puji-pujian Bani!

⁹Ia na mambahen hosahnami manggoluh, anjaha seng ilopas naheinami tartolsu. [777]

¹⁰Tongon, domma iuji Ham hanami, alo Naibata, domma ilobur Ham hanami songon na manlobur pirak. [778]

¹¹Domma itogu Ham hanami hubagas jaring, parrahut na poltik inahkon Ham bani binongeinami. [779]

¹²Ipaturut Ham do jolma margareta i atas ulunami, domma masuk hanami hubagas apuy pakon bah; tapi ipadarat Ham do hanami bani na lumbang. [780]

¹³Masukanku ma rumah-Mu mamboan galangan situtungon, galaronku ma Bamu bagah-bagahku, [781]

¹⁴ai ma na niluarhon ni bibirhu, anjaha pinarbagah ni pamanganku sanggah tarsosak ahu. [782]

¹⁵Galangan situtungon na pinamombur padasonku do Bamu, marhasoman misbou ni galangan biribiri tunggal; sai pasirsironku do Bamu lombu pakon hambing tunggal. Sela.

¹⁶Roh ma, tangar ma, nasiam haganup na mangkabiari Naibata, ase hubaritahon pambahen ni Naibata bani tonduyhu. [783]

¹⁷Hu Bani do dilo-dilo ahu marhitei pamanganku, anjaha puji-pujian domma sirsir i atas dilahku.

¹⁸Ambit adong hajahaton hukawahkon ibagas uhurhu, tontu seng tangihonon ni Tuhan ahu. [784]

¹⁹Tongon, domma itangihon Naibata ahu, domma iparuhurhon sora ni tonggongku.

²⁰Napuji ma Naibata, na so manulak tonggongku, sonai homa idop ni uhur-Ni hu bangku.