Read Batak Simalungun PSALMEN 68 Bible Online

PSALMEN 68 - Batak Simalungun bible

PSALMEN 68

¹Bani pambobai koor. Psalm ni si Daud. Sada doding.

²Jongjong do Naibata, mambur merap ma munsuh-Ni, anjaha maporus na mandomdomi-Si hun lobei-Ni. [791]

³Songon timus na niombuskon, sonai do iombuskon sidea; songon lilin malala bani apuy, sonai do bois sagala parjahat i lobei ni Naibata. [792]

⁴Tapi parpintor marmalas ni uhur anjaha marolob-olob do i lobei ni Naibata, anjaha marsurak-surak do sidea ibagas malas ni uhur. [793]

⁵Dodingkon nasiam ma Naibata, puji nasiam ma goran-Ni. Bahen nasiam ma dalan Bani na margareta i halimisan. Jahowa do goran-Ni, marolob-olob ma nasiam i lobei-Ni. [794]

⁶Ia do Bapa ni na tading maetek, anjaha Panguhum bani na mabalu. Ia do Naibata i rumah-Ni na pansing in. [795]

⁷Naibata do na pajabuhon halak na tarpunjung, na padaratkon halak na tartutup hu hadoharon, tapi sipanlawan tading do bani tanoh dorging-dorging. [796]

⁸Ham Jahowa, sanggah na luar Ham i lobei ni bangsa-Mu, sanggah langkah-langkah Ham i halimisan. Sela. [797]

⁹Dugur do tanoh on, langit manguseihon udan i lobei ni Naibata; age Dolog Sinai duyug do i lobei ni Naibata, Naibata ni Israel. [798]

¹⁰Layak do Ham mambere udan, Ham Naibata, anjaha ipahisar Ham do tanoh parbagianan-Mu sanggah loja. [799]

¹¹Marianan do ijai siminik-Mu, iparmudu Ham do, ale Naibata, halak na madoyuk marhitei dear layak-Mu.

¹²Tuhan manluarhon hata-Ni; doskon bala na buei do naboru siparambilan na madear. [800]

¹³Raja-raja ni sagala bala, maporus do sidea. Inang i rumah marbagi taban-taban. [801]

¹⁴Sai sohsoh nasiam i holangkolang ni harang-harang? Habong ni asas domma ilampis bani pirak, ambuluni maromas na gorsing. [802]

¹⁵Sanggah ipaerap Pargogoh Na So Tarimbang in sagala raja ijai, turun ma salju i atas ni Dolog Salmon. [803]

¹⁶Dolog ni naibata-naibata, ai ma Dolog Basan, dolog sibuei pakpak do Dolog Basan ai.

¹⁷Mase ma serleng matanima, hanima ale dolog sibuei pakpak, mangidah dolog na pinilih ni Jahowa gabe ianan-Ni? Tongon, Jahowa do mangiankon ai sadokah ni dokahni. [804]

¹⁸Gareta ni Naibata marlaksa-laksa anjaha marhagogohon; Tuhan roh hun Sinai masuk hu rumah-Ni na ma pansing. [805]

¹⁹Domma tangkog Ham hu atas, mamboan taban-taban; domma ijalo Ham parsombahon marrupa jolma, gari halak sipanlawan tunduk do Bamu, Ham Naibata Jahowa. [806]

²⁰Napuji ma Tuhan in ganup ari! Ia do na mangusung hita, Naibata do hatuahonta. Sela. [807]

²¹Naibata banta, ai ma Naibata parbansahan, gok bani Jahowa Naibata do haluahon humbani hamatean. [808]

²²Tongon, sai rosakan ni Naibata do ulu ni munsuh-Ni, tangkurak ni halak sihorjahon hajahaton. [809]

²³Domma ihatahon Tuhan, “Hun Basan do sidea paulakon-Ku, boanon-Ku do sidea mulak hun laut na bagas, [810]

²⁴ase marburih naheimu ibagas daroh, anjaha dilah ni baliangmu marrupei humbani munsuh.” [811]

²⁵Domma ididah halak odoran-Mu, Ham Naibata, parmasuk ni Naibatangku ampa Rajangku hubagas ianan na ma pansing in. [812]

²⁶I lobei mardalan pandoding, i pudi ni parhusapi, i tongah-tongah anak boru na manggual tambur. [813]

²⁷Marhitei koor ipuji sidea Naibata, Tuhan in, sidea na humbani bah tubuh ni Israel. [814]

²⁸Ijai do si Benjamin, sianggian, panrajai ni sidea, pangintuai ni Juda rapkon hulananni, pangintuai ni Sebulon, pangintuai ni Naptali. [815]

²⁹Tongos Ham ma hagogohon-Mu, ale Jahowa; patuduhkon Ham ma gogoh-Mu, Ham Naibata, Ham na dob mangkopkop hanami. [816]

³⁰Halani rumah-Mu, na i Jerusalem, marrohan do raja-raja na manaruhkon sibere-bere hu Bamu. [817]

³¹Sorgangi Ham ma binatang na bani arung-arung ai, hulanan ni lombu jonggi ampa anak ni lombu ni bangsa-bangsa; rojati Ham ma na impolan bani pirak, paerap Ham ma bangsa na mangkarosuhkon porang. [818]

³²Roh ma parkuasa hun Masir, halak Etiopia pe manurdukkon tanganni hubani Naibata. [819]

³³Nasiam sagala harajaon na i tanoh on, dodingkon nasiam ma Naibata, puji nasiam ma Tuhan! Sela.

³⁴Ia na margareta i langit, langit na basaia; Tonggor ma, pagomoson-Ni ma sora-Ni, sora-Ni na maling in. [820]

³⁵Tanda ma hagogohon ni Naibata! Hamuliaon-Ni do manggomgom Israel, anjaha kuasa-Ni mangatasi hombun. [821]

³⁶Marhajombuton do Naibata manrajai humbani ianan-Ni na ma pansing in; Naibata ni Israel do Ia, Ia do sibere kuasa ampa hagogohon hubani bangsa-Ni. Napuji ma Naibata! [822]