Read Batak Simalungun PSALMEN 69 Bible Online

PSALMEN 69 - Batak Simalungun bible

PSALMEN 69

¹Bani pambobai koor. Inggouni: Bunga silundat. Humbani si Daud.

²Paluah Ham ma ahu, alo Naibata, ai domma das ronsi bibirhu bah. [823]

³Mogap do ahu hubagas hubang na bagas, seng dong hajongjongan; tinob do hu toruh hubagas bah, anjaha iayubkon arus do ahu. [824]

⁴Loja do ahu halani doruh-doruhku, marsohal tolonanku; marholok do matangku halani paima-imahon bani Naibatangku.

⁵Bueinan do humbani jambulanku sidea, na mardomdom bangku seng marhala; na gogoh-gogoh do sidea na sihol mansedahon ahu, na manlawan marhitei ladung; age na so hurampas ipaksa do ahu paulakkon. [825]

⁶Ham Naibata, ibotoh Ham do haotoonku, anjaha salah na hubahen seng ponop hum Bamu.

⁷Sai ulang ma bador halani ahu sagala na marpangarapan Bamu, Ham Naibata Zebaot. Sai ulang ma maila halani ahu, sagala na mangindahi Ham, alo Naibata ni Israel. [826]

⁸Ai halani Ham do ahu bilei; anjaha hailaon do manrungkub bohingku. [827]

⁹Jadi halak na legan do ahu bani saninangku, halak na so tinanda bani anak ni inang. [828]

¹⁰Ai pongkut ni uhur bani rumah-Mu do mangankon ahu, anjaha ompas hu bangku risa-risa ni na manrisai Ham. [829]

¹¹Huarsik do tonduyhu marhitei na marpuasa, hape gabe habileion do ai bangku.

¹²Husorungkon do bangku pusok ni uhur, tapi gabe umpama do ahu ibahen sidea. [830]

¹³Gabe sihata-hataon ni halak na hundul i horbangan do ahu, sisalig-saligan bani halak parmabuk. [831]

¹⁴Tapi anggo ahu, hu Bamu do ahu martonggo, Ham Jahowa, bani panorang na dearhonsi, Ham Naibata, sai tangihon Ham ma ahu romban hubani idop ni uhur-Mu na banggal in, ampa pangurupimu na totap in. [832]

¹⁵Sai paluah Ham ma ahu humbagas hubang, ase ulang mogap ahu; sai paluah Ham ma ahu humbani na mandomdomi ahu, humbagas laut na bagas. [833]

¹⁶Sai ulang ma mayub ahu ibahen bah banggal, ulang ma ibondut luhung ahu, barang itutup parigi babahni i babouhu.

¹⁷Sai tangihon Ham ma ahu, ale Jahowa, domu hubani banggal ni idop ni uhur-Mu, dompakkon Ham ma ahu romban hubani banggal ni holong ni atei-Mu. [834]

¹⁸Ulang ma ponopkon Ham bohi-Mu dompak juakjuak-Mu; ai rusak do ahu, oloskon Ham ma mangurupi ahu.

¹⁹Roh ma Ham hundohor bani tonduyhu, paluah Ham ma in; sai paluah Ham ma ahu halani munsuhku. [835]

²⁰Itanda Ham do hahirionku, habileian pakon habadoronku; ilobei ni panonggor-Mu do ganup imbangku.

²¹Habadoron ai do mambahen rosak uhurhu, anjaha mandolei do ahu. Tarpaima-ima do ahu bani halak parholong atei, hape seng dong, sonai age bani sipangapohi, hape seng jumpah. [836]

²²Rasun do ibere sidea panganonku, anjaha sanggah na horahan ahu, na migar do ipainumkon bangku. [837]

²³Sai gabe jarot ma meja ni sidea i lobeini, anjaha horja-horja ni sidea gabe tirangkap. [838]

²⁴Sai solong ma mata ni sidea, ulang marpangidah; hitir-hitir ma binongei ni sidea bahen Ham lalab. [839]

²⁵Useihon Ham ma bani sidea ringis-Mu, anjaha gajag ni gila-Mu ma manoroh sidea.

²⁶Sai halong ma bahen Ham huta ni sidea, anjaha ulang be marisi lampolampo ni sidea. [840]

²⁷Ai iayak-ayak sidea do halak na niajar-Mu, anjaha ipabanggal sidea do naborit ni halak na niugahan-Mu. [841]

²⁸Tambahkon Ham ma na salah bani salah ni sidea, ulang ma dapotan hapintoron sidea hun Bamu. [842]

²⁹Sai sasap ma goran ni sidea humbani buku hagoluhan, ulang ma tarsurat sidea rap pakon halak parpintor. [843]

³⁰Tapi anggo ahu, madoyuk do anjaha marsik do; haluahon na hun Bamu ma, alo Naibata, na mandingdingi ahu.

³¹Pujionku ma goran ni Naibata marhitei doding, anjaha pasangaponku ma Ia marhitei doding puji-pujian;

³²ai do harosuh ni Jahowa lobih humbani anak ni lombu, lobih humbani lombu jonggi na martanduk anjaha na martambirik. [844]

³³Tonggor ma, nasiam ganup na masombuh, malas ma uhur nasiam; nasiam sipindahi Naibata, sai mulak ma hinsah uhur nasiam. [845]

³⁴Ai itangihon Jahowa do na masombuh, anjaha seng mapas Ia bani na tarbuang.

³⁵Sai ipuji langit pakon tanoh ma Ia, sonai age laut pakon sagala na manjulur ibagas.

³⁶Ai Naibata do sihol paluahkon Sion, anjaha pajongjongon-Ni do sagala huta ni Juda; marianan ma sidea ijai anjaha sidea simadasi; [846]

³⁷ginompar ni juakjuak-Ni maneansi use, anjaha na mangkaholongi goran-Ni mangiankon ai. [847]