Read Batak Simalungun PSALMEN 7 Bible Online

PSALMEN 7 - Batak Simalungun bible

PSALMEN 7

¹Doding adu-adu ni si Daud, nidodingkonni bani Jahowa, halani hata ni si Kus, marga Benjamin. [55]

²Ham Jahowa Naibatangku, hu Bamu do ahu marlingod, sai paluah Ham ma ahu humbani ganup na mangayak-ayak ahu, anjaha bansah ma bahen Ham ahu; [56]

³ase ulang iparsirak ahu songon pambahenan ni singa, anjaha isarad seng dong na paluahkon. [57]

⁴Ham Jahowa Naibatangku, anggo hubahen on, anjaha ihorjahon tanganku na so sintong, [58]

⁵anggo hubahen na jahat hubani halak na mardamei-damei manggoluh rap pakon ahu, anjaha huodoh-odoh na manosak ahu seng marhala, [59]

⁶sai ipardakdak munsuhku ma ahu ronsi dapot, irojati goluhku hu tanoh, anjaha igijigkon bani orbuk hasangaponku. Sela. [60]

⁷Jongjong ma Ham, Jahowa, ibagas ringis-Mu, jongjong ma Ham mangimbang gila ni na manosak ahu, puho ma Ham mangurupi ahu, ai Ham do siparentahkon uhum. [61]

⁸Sai iinggoti hulanan ni bangsa ma Ham, anjaha marparatas ma Ham i babou, i atas ni sidea. [62]

⁹Jahowa do na manguhum sagala bangsa-bangsa. Luluhon Ham ma ahu Ham Jahowa, romban hubani hapintoronku, romban hubani habujuron na jumpah bangku. [63]

¹⁰Sai mangadi ma hajahaton ni parjahat; tapi sai pargogohi Ham ma halak parpintor! Ai Ham do siuji uhur pakon piah-piah, Ham Naibata parpintor. [64]

¹¹Naibata do gantar bangku, sipaluah na pintor uhur. [65]

¹²Panguhum na pintor do Naibata, anjaha Naibata na manggila ganup ari. [66]

¹³Anggo seng ipaubah halak uhurni, asahonni ma podangni, pasangonni ma siorni laho manembak. [67]

¹⁴Dompakkononni ma hubani sinjata pamunuh, nahit ma panahni ibahen. [68]

¹⁵Tonggor ma, solat ma bani hagedukon, boratan rumah ma ia bani hamagouan, anjaha itubuhkon ladung. [69]

¹⁶Ihurak do godung anjaha bagas ibahen, tapi ia sandiri do madabuh hubagas godung na binahenni ai. [70]

¹⁷Hajahaton na binahenni mulak dabuh bani uluni, anjaha odoh-odohni mulak manipa tangkurakni. [71]

¹⁸Pujionku do Jahowa halani hapintoron-Ni, anjaha dodingkononku do goran-Ni Jahowa Sitimbulan in.