Read Batak Simalungun PSALMEN 71 Bible Online

PSALMEN 71 - Batak Simalungun bible

PSALMEN 71

¹Bamu do, Ham Jahowa ahu marlingod, ulang lopas Ham ahu bador lalab. [849]

²Pabansah Ham ma ahu halani hapintoron-Mu, anjaha paluah Ham ma ahu; paeleng Ham ma pinggol-Mu bangku, anjaha urupi Ham ma ahu.

³Ham ma gabe dolog batu parlingodan bangku, benteng na toguh bahen haluahonku; tongon, Ham do dolog batu ampa batar-batar bangku. [850]

⁴Ham Naibatangku, sai paluah Ham ma ahu humbani tangan ni parjahat, humbani tangan ni pargeduk pakon sibahen paksa.

⁵Ham do pangarapanku Tuhan; Ham Jahowa, hatengeran ni uhurhu humbani sietek-etekonku nari. [851]

⁶Ham do pangunsandeianku humbani partapaan nari, humbani boltok ni inang nari Ham do pangurupi bangku, Ham do tongtong sipujionku. [852]

⁷Gabe halongangan do ahu bani buei halak, halani Ham do haporusanku na toguh. [853]

⁸Sai gok do pamanganku bani puji-pujian Bamu, gok hahormaton Bamu manipat ari. [854]

⁹Ulang ma ambukkon Ham ahu dob matua; bani na lambin bois gogohku, ulang ma tadingkon Ham ahu. [855]

¹⁰Ai ipahata-hata munsuhku do ahu, halak na manguhurhon hosahku manriahi, [856]

¹¹nini sidea, “Domma itadingkon Naibata ia, ayak-ayak anjaha tangkap ma ia, seng dong be na paluahkonsi.”

¹²Ham Naibata, sai ulang ma ganggang Ham humbangku, Ham Naibatangku, papodas Ham ma mangurupi ahu. [857]

¹³Sai maila anjaha magou ma sidea na mamunsuhi ahu; sai tarbador anjaha masese ma sidea na mangindahi hamagouanku. [858]

¹⁴Tapi anggo ahu, tongtong do marpangarapan, anjaha papuji-pujionku do Ham. [859]

¹⁵Sai baritahononkon ni pamanganku do hapintoron-Mu, sonai haluahon na hun Bamu ari-ari, ai seng tarbilangi ahu ai. [860]

¹⁶Roh do ahu, mangunsagahkon hagogohon ni Jahowa, mambaritahon hapintoron, hapintoron-Mu tumang. [861]

¹⁷Ham Naibata, Ham do mangajari ahu humbani sietek-etekon nari, ronsi sonari sai huambilankon do halongangan na binahen-Mu. [862]

¹⁸Age ronsi matua ahu anjaha lopak ubanku, Ham Naibatangku, ulang ma tadingkon Ham ahu; ase huambilankon pambahenan ni tangan-Mu bani sundut on, sonai hagogohon-Mu bani ginompar na sihol roh. [863]

¹⁹Age hapintoron-Mu, na das ronsi langit ai, Ham Naibata, Ham sibahen halongangan banggal, ise ma na songon Ham, ale Naibata? [864]

²⁰Ham, na dob padageihon bennami hasosakan pakon parmaraan, sai pagoluhon-Mu do hanami use, sai panaikon-Mu do hanami use humbagas luhung-luhung ni tanoh on. [865]

²¹Sai tambahan-Mu do habanggalonku, anjaha sai apohon-Mu do ahu.

²²Jadi ahu pe, sai pujionku do Ham marhitei arbap, halani hasintongan-Mu, ale Naibata; sai dodingkononku do Ham marhitei husapi, Ham na ma pansing ni Israel. [866]

²³Marolob-olob do bibir hubani na mandoding-doding ahu Bamu, age tonduyhu na dob pinaluah-Mu.

²⁴Dihut do dilahku, mansahap-sahapkon hapintoron-Mu ari-ari, ai domma maila anjaha tarbador na manguhurhon hamagouanku. [867]