Read Batak Simalungun PSALMEN 72 Bible Online

PSALMEN 72 - Batak Simalungun bible

PSALMEN 72

¹Humbani si Salomo. Ham Naibata, sai bere Ham ma panguhumion-Mu bani raja, pakon hapintoron-Mu bani anak ni raja, [868]

²ase ibotoh manguhum bangsa-Mu ibagas hapintoron, ampa halak na madoyuk domu hubani uhum.

³Sai mamboan hadameion ma sagala dolog bani bangsa in, anjaha buntu-buntu mamboan hapintoron. [869]

⁴Sai ipintori ma halak na madoyuk i tongah-tongah ni bangsa in. Sai ipaluah ma sagala halak na masombuh, anjaha iropuki sipangodoh-odoh. [870]

⁵Sai songon mata ni ari ma dokah ni umurni, anjaha songon bulan ma ia layur marsundut-sundut. [871]

⁶Songon udan na madabuh bani poyon-poyon ma ia, songon udan neinei na mangarbahi tanoh. [872]

⁷Sai martumbor ma hapintoron bani panorangni, anjaha gok hadameion, ronsi seng dong be bulan. [873]

⁸Manggomgomi ma ia hun laut das hu laut, humbani Bah Eprat das hu tampakan ni tanoh on. [874]

⁹Marsombah ma hubani imbang-imbangni, anjaha sagala munsuhni mandilat tanoh. [875]

¹⁰Raja ni Tarsis pakon sagala pulou mamboan sibere-bere bani, raja Seba pakon Etiopia mambere sohei. [876]

¹¹Manrogop ma sagala raja manombahsi, anjaha ganup bangsa mangidangisi. [877]

¹²Tongon, sai paluahonni do halak na masombuh, na mangindo pangurupion ni halak na madoyuk ampa halak na so dong pangurupi bani. [878]

¹³Maidop do uhurni bani halak na malumat pakon na musil, anjaha paluahonni do tonduy ni halak na masombuh.

¹⁴Paluahonni do hosah ni sidea humbani panokohon pakon pangkilangon, harga tumang do daroh ni sidea bani panonggorni. [879]

¹⁵Sai manggoluh ma ia, anjaha ibere ma hubani omas na hun Seba; anjaha sitonggoonkon do ia tongtong, ganup panorang sipasu-pasuon do ia. [880]

¹⁶Sai junah ma omei i tanoh in, das bani pakpak ni dolog; martumbor ma buahni songon Libanon, anjaha manggargar ma buyurni songon poyon na i talun. [881]

¹⁷Sai totap ma goranni lanjar, sadokah dong mata ni ari sai tarbarita ma goranni; sai dapotan pasu-pasu ma marhiteihonsi sagala bangsa, anjaha parhatuahon ni sidea ma ia. [882]

¹⁸Napuji ma Jahowa Naibata ni Israel, sahalak-Si do sibahen halongangan. [883]

¹⁹Anjaha na puji ma goran-Ni na marmulia in sadokah ni dokahni, gok hamuliaon-Ni ma sab tanoh on. Amen, alo Amen. [884]

²⁰Marpunsa ma tonggo ni si Daud, anak ni si Isai.