Read Batak Simalungun PSALMEN 73 Bible Online

PSALMEN 73 - Batak Simalungun bible

PSALMEN 73

¹Psalm ni si Asap. Tongon, mardear layak do Naibata bani Israel, bani halak na borsih maruhur. [885]

²Tapi anggo ahu, narus do jiris naheihu, narus do ahu targompang. [886]

³Ai simburu do uhur hubani sigijang uhur, mangidah marhasonangan halak parjahat. [887]

⁴Seng borit-boritan sidea, jorgit anjaha tambos do angkula ni sidea.

⁵Seng mangonai bani sidea sunsah ni hajolmaon, anjaha seng ihonai na marsik sidea songon halak na legan. [888]

⁶Halani ai marsinongkok gijang ni uhur do sidea, anjaha marhiouhon panipuon.

⁷Halani hamomburonni marsual-sual do hajahaton humbani sidea, linir do na masambor humbani uhur ni sidea. [889]

⁸Manrisai do sidea, anjaha mansahap-sahapkon hajahaton, marhasoman pangenjengon idalankon ondam-ondam.

⁹Ipatanggak sidea do babahni das hu langit, anjaha maor-aor do dilahni i tanoh on. [890]

¹⁰Halani ai marbalik do bangsa in mangirikkon sidea, anjaha isobur hata ni sidea ai songon bah. [891]

¹¹Sai ihatahon sidea do, “Sonaha ma pambotoh ni Naibata? Ai dong habotohon ni Na Timbul in?” [892]

¹²Tonggor ma, sonai do halak parjahat, marsonang-sonang lalab, lambin junjun habayakonni.

¹³Jadi soya-soya do hape hupaborsih uhurhu, huburihi tanganku tanda lang marpipot. [893]

¹⁴Ai marsitaronon do ahu ari-ari, anjaha hona pinsang ahu siap sogod.

¹⁵Porini ningku, “Songon sidea ma parsahapku, tonggor ma, ginompar ni anakmu do na hutahihon ijai.” [894]

¹⁶Tapi sanggah marpingkir-pingkir ahu, laho mangarusi ai, gabe naborit do ai bani panonggorhu,

¹⁷paima masuk ahu hubani ianan ni Naibata na pansing in, laho manangkas-nangkasi ujung ni sidea. [895]

¹⁸Tongon, bani ianan na landit do ipajongjong Ham sidea, ipaturut Ham do sidea madabuh hubagas hakahouon. [896]

¹⁹Ibagas sangkidop mata do sidea magou, bois anjaha masab do sidea, majangin tumang.

²⁰Masab do sidea songon nipi sanggah puho, anjaha lupa do halak bani rupani. [897]

²¹Sanggah marmongot-mongot uhurhu, anjaha songon na itobak-tobak piah-piahku,

²²maoto do ahu anjaha seng marpangarusion, songon na so maruhur do ahu i lobei-Mu. [898]

²³ Tapi sai tongtong do ahu rapat pakon Ham, ijolom Ham do tanganku siamun. [899]

²⁴ Itogu Ham do ahu marhitei sura-sura-Mu, anjaha jaloon-Mu do ahu hu hasangapon. [900]

²⁵ Ise ma hasomanku i nagori atas? Sobali Ham seng dong iharosuhkon uhurhu i tanoh.

²⁶ Age pe lambin melus badanku pakon uhurhu, batar-batar bani uhurhu ampa rupeihu, ai ma Naibata sadokah ni dokahni. [901]

²⁷Tongon, sai na magou do na paganggang dirini hun Bamu, sai boiskonon-Mu do sagala na marbalik hun Bamu. [902]

²⁸Tapi anggo ahu, hatuahon do bangku na dohor ai bani Naibata; Jahowa do hubahen hatengeran ni uhurhu, sai baritahononku do pambahenan-Ni ganup. [903]