Read Batak Simalungun PSALMEN 74 Bible Online

PSALMEN 74 - Batak Simalungun bible

PSALMEN 74

¹Doding podah humbani si Asap. Mase ma, Ham Naibata, itulak Ham hanami lalab, gajag ringis-Mu dompak biribiri na pinarmahan-Mu? [904]

²Sai ingat Ham ma kuria-Mu, na binangkuhon-Mu humbani sapari nari, na tinobus-Mu gabe bangsa parbagianan-Mu; Dolog Sion on, na niianan-Mu. [905]

³Tujuhon Ham ma langkah-Mu dompak na dob dokah maseda in, haganup do iparseda munsuh i rumah na pansing in. [906]

⁴Marsurak do imbang-Mu bani ianan partumpuan, ipajongjong sidea do mandera bahen partinandaan. [907]

⁵Songon halak na mangalbangkon hapakni i harangan laho manrimbas hayu anak, sonai do sidea idahon; [908]

⁶hapak pakon martil do ipangantukkon sidea bani uhir-uhiran-Mu, ase mangkaseda; [909]

⁷isurbuy sidea do rumah-Mu na pansing in, ibutaki sidea ianan ni goran-Mu das ronsi onjolanni. [910]

⁸Nini sidea do ibagas uhurni, “Boiskon hita ma haganup.” Domma isurbuy sidea haganup rumah panumbahan i nagori on. [911]

⁹Partanda bennami seng dong ididah hanami be, seng dong be nabi, anjaha seng ibotoh hanami atap piga dokah on. [912]

¹⁰Piga dokah nari, Ham Naibata, sai mapas munsuh in? Maningon pahirion ni munsuh mando goran-Mu lanjar? [913]

¹¹Mase ma itarik Ham tangan-Mu? Mase ma marlompit tangan Ham? [914]

¹²Tapi Rajangku do Naibata humbani nabasaia, Ia do mambahen haluahon i tanoh on. [915]

¹³Ham do mambolah laut marhitei gogoh-Mu, irosaki Ham do ulu ni naga ibagas bah. [916]

¹⁴Ham do manrosaki ulu ni naga, ibere Ham do ai panganon ni binatang na i halimisan. [917]

¹⁵Ham do parohkon bah tubuh pakon bah banggal, Ham do pahorah bah banggal na so ongga horah. [918]

¹⁶Ham do simada arian pakon borngin; Ham do pajonamkon na lihar pakon mata ni ari. [919]

¹⁷Ham do manotapkon parbalogan ni tanoh; Ham do mangadongkon musim logou ni ari pakon musim udan. [920]

¹⁸Ingat Ham ma: Munsuh do na pahirihon in, Ham Jahowa, ampa bangsa na oto mangapasi goran-Mu. [921]

¹⁹Ulang ma padas Ham hosah ni kuhuy-Mu bani binatang; ulang ma lalab lupa Ham bani goluh ni siminik-Mu na marsik in. [922]

²⁰Dingat Ham ma padan in; ai gok pangkilangon do longkit-longkit ni nagori on. [923]

²¹Ulang ma paturut Ham bador halak na niodoh-odoh; lopas Ham ma halak na masombuh pakon na madoyuk mamuji goran-Mu.

²²Jongjongkon Ham ma, ale Naibata, dalankon Ham ma kuasa-Mu! Ingat Ham ma parpahiri ni na oto in Bamu. [924]

²³Ulang ma lupa Ham bani parsurak ni munsuh-Mu, bani oga-oga ni imbang-Mu na tongtong martimburak in.