Read Batak Simalungun PSALMEN 75 Bible Online

PSALMEN 75 - Batak Simalungun bible

PSALMEN 75

¹Bani pambobai koor. Inggouni: Ulang parseda. Psalm humbani si Asap. Sada doding.

²Ipuji hanami do Ham, ale Naibata, ipuji hanami do Ham, anjaha sidilo goran-Mu do mambaritahon halongangan na binahen-Mu. [925]

³Tongon, bani panorang na hutotapkon, dalankononku do uhum ibagas hasintongan. [926]

⁴Dugur pe tanoh on ampa na mangiankonsi, tapi anggo Ahu domma totap hubahen onjolanni. Sela. [927]

⁵Ningku do dompak sigijang uhur, “Ulang gijang uhurmu!” anjaha dompak halak parjahat, “Ulang pagijang tandukmu! [928]

⁶Ulang pagijang tandukmu, ulang hatahon hajungkaton dompak Batu Gingging in.” [929]

⁷Ai sedo hun hapoltakan atap hun hasundutan, sedo hun halimisan roh ni hatimbulon;

⁸ai Naibata do panguhum, Ia do patoruh na sada, Ia patimbul na sada nari. [930]

⁹Tongon, i tangan ni Jahowa do panginuman, marisi anggur na gurgur, na niraruan; painumkonon-Ni ma in, ningon inumon ni sidea ronsi paradni, maningon minum ganup halak parjahat i tanoh on. [931]

¹⁰Tapi anggo ahu marolob-olob do sadokah ni dokahni, dodingkononku do Naibata ni si Jakob.

¹¹Upokkonon-Ni do ganup tanduk ni halak parjahat, tapi pagijangon do ia tanduk ni halak parpintor.