Read Batak Simalungun PSALMEN 77 Bible Online

PSALMEN 77 - Batak Simalungun bible

PSALMEN 77

¹Bani pambobai koor. Bani si Jedutun. Psalm humbani si Asap.

²Bani Naibata do laho sorangku, dilo-dilo do ahu hu Bani, bani Naibata do laho sorangku, ase itangihon ahu. [940]

³Bani ari hasosakanku hupindahi do Tuhan; sai herbang do tanganku borngin seng marnamangadi; seng ra tarapoh tonduyhu.

⁴Taringat do ahu bani Naibata, gabe morong ma ahu; marpingkir-pingkir, gabe hurleh ma tonduyhu. Sela.

⁵Ipaturut Ham do bodak matangku, gabe bulinsah ma ahu, seng boi marsahap.

⁶Sai hupingkiri do panorang na basaia, taringat do ahu bani tahun na dob dokah salpu. [941]

⁷Marsahap-sahap do ahu ibagas uhurhu borngin, marpingkir-pingkir do ahu anjaha manulimati tonduyhu. [942]

⁸Mintor sadokah ni dokahni ma nani mangambukkon Tuhan, seng ulakan-Ni be nani maridop ni uhur? [943]

⁹Sadokah ni dokahni ma nani rotap idop ni uhur-Ni, anjaha mintor masab ma bagah-bagah-Ni lanjar?

¹⁰Mintor lupa ma nani Naibata marontou ni uhur, atap na dob tarkunsi ma nani holong ni atei-Ni halani ringis-Ni? Sela.

¹¹Jadi ningku do, “On do na papusok uhurhu, na mubah ai pambahenan ni Na Tang Sitimbulan in.” [944]

¹²Sai dingatonku do pambahenan ni Jahowa; sai dingatonku do halongangan, na binahen-Mu humbani na basaia.

¹³Sai sahap-sahapkononku do sagala lahoan-Mu, anjaha sai hupingkir-pingkiri do pambahenan-Mu. [945]

¹⁴Ham Naibata, pansing do dalan-Mu; ise ma sisombahon, na marhabanggalon songon Naibata? [946]

¹⁵Ham do Naibata sihorjahon halongangan, domma ipataridahkon Ham gogoh-Mu bani bangsa-bangsa. [947]

¹⁶Domma ipaluah Ham bangsa-Mu marhitei tangan-Mu, anak ni si Jakob pakon si Josep. Sela. [948]

¹⁷Domma ididah sagala bah Ham, ale Naibata, domma ididah bah Ham, gabe godor, anjaha luhung pe hitir-hitir. [949]

¹⁸Manguseihon bah do sagala hombun, mardobur longgur i awang-awang, anjaha panah-Mu mardejeb-dejeb.

¹⁹Marnunut do maraloling longgur-Mu, hilap-Mu pasiang dunia on, dugur anjaha duyug do tanoh on.

²⁰Mardalan do Ham hun laut, bah banggal pasar-Mu, tapi ise pe lang manandai bokas-Mu. [950]

²¹Ham do na manogu bangsa-Mu songon hulanan ni biribiri, marhitei tangan ni si Musa pakon si Aron. [951]