Read Batak Simalungun PSALMEN 78 Bible Online

PSALMEN 78 - Batak Simalungun bible

PSALMEN 78

¹Doding podah humbani si Asap. Tangihon nasiam ma, ale bangsangku, podahku, tarehon ma pinggol nasiam hubani hata ni pamanganku.

²Sihol do buhaonku pamanganku mangkatahon umpama, sihol do patalaronku rusia humbani panorang na basaia. [952]

³Na dob binogeinami ampa binotohnami, na tinuri-turihon ni na lobeita hu bennami. [953]

⁴Seng bulih ponopkononnami ai bani niombah ni sidea, tapi maningon baritahononkon do bani sundut na mangihut; ai ma pambahenan sipasangap Jahowa, pakon hagogohon-Ni, ampa halongangan na binahen-Ni ai.

⁵Domma ipajongjong sada hasaksian bani Jakob, ibere sada titah bani Israel, itonahkon do bani ompungta pasal ai, ase ipabotohkon ai bani niombah ni sidea, [954]

⁶ase ibotoh sundut na mangihut ai, ase ginompar na sihol tubuh ai jongjong mambaritahon ai bani niombahni,

⁷ase ibahen sidea Naibata hatengeran ni uhur ni sidea. Anjaha ulang ihalupahon pambahenan ni Naibata, na banggal ai, tapi ihorjahon ma titah-Ni,

⁸ase ulang sidea gabe doskon ompung ni sidea, ai ma sundut siparbalik anjaha sipanggeori, sundut na so totap uhurni, anjaha tonduyni seng totap bujur dompak Naibata. [955]

⁹Anak ni si Efraim, marsinjatahon sior, manginsurut do bani parporangan.

¹⁰Seng iramotkon sidea parpadanan binahen ni Naibata, anjaha mangengkar do sidea mardalan domu hubani titah-Ni.

¹¹Lupa do sidea bani pambahenan-Ni na banggal ai, pakon bani tanda halongangan, na dob pinatuduhkon-Ni bani sidea.

¹²I lobei ni mata ni ompung ni sidea ibahen do halongangan, i tanoh Masir, bani talun Soan. [956]

¹³Ibolah do laut, laho padiparhon sidea, ibongbong do bah songon bongbongan. [957]

¹⁴Ibobahon do sidea marhitei hombun arian, marhitei sondang ni apuy borngin. [958]

¹⁵Ibolah do dolog batu i halimisan, ibere do sidea sombuh minum songon humbani bah banggal; [959]

¹⁶Iparoh do bah humbani dolog batu, anjaha ibahen do bah mabaor songon bah mardalan.

¹⁷Tapi sai inunut sidea do mardousa dompak-Si, iimbang do Ia Na Tang Sitimbulan in i halimisan. [960]

¹⁸Sai ilajou sidea do Naibata ibagas uhurni, itunggu sidea do sipanganon pasombuh hisapni. [961]

¹⁹Marungut-ungut do sidea dompak Naibata, nini, “Mintor mangasup ma Naibata pasirsirhon sipanganon i halimisan?”

²⁰Tongon, ibogbog do dolog batu gabe mabaor bah, marbanggal binanga, tapi mintor tarbahen-Si ma mambere ruti atap pasirsirhon gulei bani bangsa-Ni?

²¹Halani ai, dob ibogei Jahowa ai, manggila ma Ia, gajag ma apuy mandorab Jakob, marjimbur gila dompak Israel,

²²halani seng porsaya sidea bani Naibata, anjaha seng tenger uhurni bani pangurupi-Ni. [962]

²³Jadi ibere ma parentah bani hombun na i atas, anjaha ibuha labah ni langit.

²⁴Ipaturun ma bani sidea udan manna, anjaha ibere ma bani sidea gandum nagori atas. [963]

²⁵Ruti ni malekat do ipangan ganup sidea, bohal do itongos bani sidea laho pabosurhon.

²⁶Ibahen do logou hapoltakan marombus i langit, anjaha iparroh logou dangsina marhitei gogoh-Ni. [964]

²⁷Ipaturun do bani sidea gulei songon orbuk bueini, anjaha manuk-manuk na marhabong songon horsik na i topi ni laut. [965]

²⁸Ipandabuhkon hu tongah-tongah ni parsaranan ni sidea, inggot bani ianan ni sidea.

²⁹Mangan do sidea anjaha bosuran, na pinindo ni uhur ni sidea ibere do bani sidea. [966]

³⁰Lape sombuh ope sidea mansuhuni hisap-hisapni, ongom ope sidea bani sipanganon, [967]

³¹jadi gajag ma ringis ni Naibata mandorab sidea, ibunuh ma buei na sangap-sangap ni sidea, anjaha rasei na maposo ni Israel.

³²Age pe sonai ganup na masa ai, inunut sidea do mardousa, anjaha seng ihaporsayai halongangan na binahen-Ni. [968]

³³Jadi iboiskon ma ari-ari ni sidea gabe na lang ampa tahun ni sidea gabe hasonggotan. [969]

³⁴Anggo roh Ia mambunuh sidea, ipindahi sidea ma Ia, mulak ma sidea pindah-pindah bani Naibata. [970]

³⁵Idingat sidea ma, Naibata do hape dolog batu bani sidea, anjaha Naibata, Na Tang Sitimbulan in do sipaluah bani sidea. [971]

³⁶Tapi ipalemes-lemes do parsahap ni Bani, anjaha iladungi Ia marhitei dilahni.

³⁷Seng totap uhur ni sidea Bani, anjaha seng totap sidea bani padan-Ni. [972]

³⁸Tapi Ia, siparontou ni uhur, isasap do dousa ni sidea, seng iboiskon sidea. Gati do iampogi ringis-Ni, anjaha seng ganup ringis-Ni ipadalan.

³⁹Ai idingat, daging do sidea, logou na mangombus anjaha seng mulak be. [973]

⁴⁰Gatini in sidea mamuhoi ringis-Ni i halimisan, anjaha manunsahi-Si bani tanoh dorging-dorging ai! [974]

⁴¹Iulak-ulak sidea do manlajou Naibata, anjaha ipusoki uhur ni Na Pansing ni Israel.

⁴²Seng mardingat be sidea bani hagogohon-Ni, bani ari na pinaluah-Ni sidea humbani imbangni;

⁴³sanggah binahen-Ni tanda i Masir, ampa halongangan-Ni bani talun Soan. [975]

⁴⁴Ipaubah do bahni gabe daroh, ampa binangani, gabe lang tarinum. [976]

⁴⁵Itongos do bani sidea rongit laho mamboiskonsi, ampa tiktikan laho mansedahon. [977]

⁴⁶Bani tamponok do ibere suan-suanan ni sidea, anjaha hinorjahonni bani balang. [978]

⁴⁷Matei do anggur ni sidea ibahen sira-sira, ampa hayu ara ni sidea ibahen namur na borgoh. [979]

⁴⁸Rasei do pinahan ni sidea ibahen bunrung, anjaha marmateian hulanan ni biribirini ibahen sampar. [980]

⁴⁹Itongos do bani sidea apuy ni ringis-Ni, gila, marah ampa hasosakan, malekat sipangagou na marhulan-hulan.

⁵⁰Ipaturut do mardalan ringis-Ni, seng iramotkon tonduy ni sidea humbani hamatean, tapi iondoskon do goluh ni sidea hubani sampar.

⁵¹Ibogbog do ganup bunga tubuh ni Masir, ai ma limbuah ni gogoh ni sidea, bani lampolampo ni si Ham. [981]

⁵²Ipaingkat do bangsa-Ni songon biribiri, anjaha ibobai sidea songon hulanan i halimisan. [982]

⁵³Sonang do sidea iiring-iring, seng pala marhabiaran, tapi anggo munsuhni rungkub do ibahen laut. [983]

⁵⁴Ibobahon do sidea hu tanoh-Ni na pansing in, hubani dolog na binangkuhon-Ni marhitei tangan-Ni siamun. [984]

⁵⁵Iusir do hun lobei ni sidea bangsa sipajuh begu-begu, ibagihon do tanoh pusaka bani sidea, anjaha sagala marga ni Israel ibahen do marianan bani lampolampo ni sidea. [985]

⁵⁶Tapi ilajou sidea do use Naibata, anjaha iimbang Na Tang Sitimbulan in, anjaha seng iramotkon hasaksian-Ni. [986]

⁵⁷Marbalik do sidea, mosei songon ompung ni sidea, mubah do sidea songon sior panipu. [987]

⁵⁸Iparoh sidea do ringis-Ni marhitei buntu-buntu panombahan ni sidea, ipatubuh do simburu-Ni marhitei gana-gana ni sidea. [988]

⁵⁹Ibogei Naibata ma ai, gabe marah ma Ia, iambukkon ma ganup Israel. [989]

⁶⁰Ipahalong ma rumah-Ni i Silo, ai ma ianan-Ni i tongah-tongah ni jolma. [990]

⁶¹Ilopas do hagogohon-Ni tartaban, anjaha iondoskon hajagaron-Ni bani tangan ni imbang-Ni. [991]

⁶²Iondoskon do bangsa-Ni bani podang, anjaha marah do Ia bani bangsa niain-Ni.

⁶³Anak garama ni sidea bois ipangan apuy, seng dong be na mandoding-doding bani boru ni sidea. [992]

⁶⁴Rasei do malim ni sidea ibahen podang, anjaha na mangkabaluhon sidea seng tangis be. [993]

⁶⁵Jadi puho ma Tuhan songon humbani na modom, songon puanglima na tarjolma humbani na minum anggur.

⁶⁶Manginsurut do imbang-Ni ibogbog, anjaha bador sidea ibahen sadokah ni dokahni. [994]

⁶⁷Iambukkon do lampolampo ni si Josep, anjaha seng ipilih marga Efraim. [995]

⁶⁸Tapi marga Juda do ipilih, Dolog Sion na hinaholongan-Ni ai, [996]

⁶⁹Ipajongjong do ianan-Ni na pansing in songon gijang ni langit, songon tanoh, na pinajonam-Ni sadokah ni dokahni. [997]

⁷⁰Ipilih do si Daud, juakjuak-Ni ai, ibuat do ia humbani na marmahan biribiri. [998]

⁷¹Humbani na mangala-alai biribiri na inuman ialop ia, laho marmahan Jakob bangsa-Ni in, pakon Israel parbagianan-Ni. [999]

⁷²Jadi iparmahan ma sidea humbani pintor ni uhurni, anjaha ibobahon sidea marhitei hapentaran ni tanganni. [1000]