Read Batak Simalungun PSALMEN 79 Bible Online

PSALMEN 79 - Batak Simalungun bible

PSALMEN 79

¹Psalm humbani si Asap. Ham Naibata, domma imasuki sipajuh begu-begu tanoh pusaka-Mu domma ibutaki sidea rumah panumbahan-Mu na pansing in, domma marumbak Jerusalem ibahen. [1001]

²Ipamberehon sidea do bangkei ni juakjuak-Mu panganon ni manuk-manuk na i awang-awang, anjaha daging ni hinaholongan-Mu bani binatang harangan. [1002]

³Ipanduruskon do daroh ni sidea songon bah inggot Jerusalem, anjaha sahalak pe lang dong na mananomsi.

⁴Gabe habadoron do hanami bani bangsa simbalognami, gabe hahirion pakon siapason bani halak na manginggoti hanami. [1003]

⁵Sadiha dokah nari, Ham Jahowa, manggila Ham lalab, anjaha marjimbur-jimbur gila-Mu songon apuy? [1004]

⁶Useihon Ham ma ringis-Mu bani sipajuh begu-begu, na so mananda Ham ampa harajaon na so mandilo goran-Mu! [1005]

⁷Ai domma itolon sidea si Jakob, anjaha iparseda iananni.

⁸Ulang ma hira Ham bennami hajahaton ni na lobeinami! Podas ma idop ni uhur-Mu tongoskon Ham manjumpahkon hanami, ai mandatei tumang do hanami. [1006]

⁹Sai urupi Ham ma hanami, Ham Naibata ni haluahonnami, halani hamuliaon ni goran-Mu! Paluah Ham ma hanami, sasap Ham ma dousanami halani goran-Mu!

¹⁰Mase ma hatahonon ni sipajuh begu-begu, “Ija do Naibata ni sidea?” Pabotohkon Ham ma bani sipajuh begu-begu i lobei ni matanami pambalason bani daroh ni juakjuak-Mu, na niduruskon in. [1007]

¹¹Sai das ma hu lobei-Mu doruh-doruh ni na tartaban, romban hubani hagogohon ni tangan-Mu paturut Ham ma manggoluh na sahira bunuhon hinan. [1008]

¹²Balas Ham ma hubani bangsa simbalognami, pitu hali lompit bani abingan ni sidea, apas-apas na niapaskon ni sidea Bamu, Ham Tuhan. [1009]

¹³Tapi anggo hanami, bangsa-Mu ampa biribiri na pinarmahan-Mu, sai Ham do pujionnami sadokah ni dokahni, anjaha baritahononnami do puji-pujian Bamu, marsundut-sundut. [1010]