Read Batak Simalungun PSALMEN 80 Bible Online

PSALMEN 80 - Batak Simalungun bible

PSALMEN 80

¹Bani pambobai koor. Inggouni: Silundat. Hasaksian humbani si Asap. Sada Psalm.

²Ham Siparmahan Israel, tangar, tangar Ham ma; Ham, na mambobahon Josep songon biribiri, Ham na marhotak bani herubim, roh ma Ham marsinondang. [1011]

³i lobei ni Efraim, Benjamin pakon Manase! Puhoi Ham ma gogoh-Mu anjaha roh ma paluahkon hanami. [1012]

⁴ Ham Naibata Zebaot, pasuang Ham ma hanami, sondangkon Ham ma bohi-Mu, ase maluah hanami. [1013]

⁵Ham Jahowa Naibata Zebaot, piga dokah nari manringis Ham dompak tonggo ni bangsa-Mu?

⁶Ipapangankon Ham do bani sidea ruti iluh, anjaha ipainumkon Ham do bani sidea iluh marlobih-lobih. [1014]

⁷Ibahen Ham do hanami gabe mula ni partinggilan bani simbalognami, anjaha sai iapasi munsuhnami do hanami. [1015]

⁸ Ham Naibata Zebaot, pasuang Ham ma hanami, sondangkon Ham ma bohi-Mu, ase maluah hanami. [1016]

⁹Iorbat Ham do sada hayu anggur hun Masir, iusir Ham do bangsa-bangsa, laho manuankon ai hujai. [1017]

¹⁰Ham do pajorei tanoh in i lobei ni, jadi marurat ma ia anjaha igoki tanoh in.

¹¹Rungkub do dolog ibahen halinohni, hayu ares ni Naibata ibahen ranting-rantingni.

¹²Iherbangkon do dangkahni das hu laut, anjaha tumborni das hu Bah Eprat. [1018]

¹³Mase ma iparseda Ham hondorni, gabe uhur-uhur ni pamontas mambuatisi? [1019]

¹⁴Iguyang aili na hun harangan do ia, anjaha igagati binatang na i talun.

¹⁵Ham Naibata Zebaot, marpangulaki ma uhur-Mu, manatap ma Ham hun nagori atas; pardiatei Ham ma hayu anggur-Mu on,

¹⁶anjaha pajongjong Ham ma in, na sinuan ni tangan-Mu siamun in. [1020]

¹⁷Domma itutung sidea in bani apuy, domma iroboh; sai magou ma sidea marhitei pangondam ni panonggor-Mu.

¹⁸Tangan-Mu ma na manramotkon halak parsiamun-Mu, anak ni jolma na pinabanggal-banggal-Mu. [1021]

¹⁹Seng anjai manginsurut hanami hun Bamu; pagoluh Ham ma hanami ase goran-Mu idilo hanami.

²⁰Ham Jahowa Naibata Zebaot, pasuang Ham ma hanami, sondangkon Ham ma bohi-Mu, ase maluah hanami. [1022]