Read Batak Simalungun PSALMEN 83 Bible Online

PSALMEN 83 - Batak Simalungun bible

PSALMEN 83

¹Sada doding. Psalm humbani si Asap.

²Ham, Naibata, ulang ma sai sip Ham, ulang ma ipanengel-nengel Ham, ulang ma sai soh Ham, ale Naibata! [1039]

³Ai tonggor ma, sai manggeori do munsuh-Mu, na mandomdomi Ham, sai ipadorgak do uluni.

⁴Sai mambahen ranggi-ranggian do sidea mangimbang munsuh-Mu, anjaha manriahi sidea manlawan halak na niondingan-Mu. [1040]

⁵Nini sidea, “Eta, boiskon hita ma sidea songon sada bangsa, ase ulang be dong na mardingat Israel.”

⁶Tongon, marsada ni uhur do sidea manriah, anjaha marpadan do sidea manlawan Ham:

⁷Lampolampo ni Edom pakon Moab, halak Ismael pakon halak Hagar;

⁸Gebal pakon Amon ampa Amalek, halak Palistim pakon par Tirus;

⁹dihut do Assur hasoman ni sidea, gabe panungkoli bani ginompar ni si Lot. Sela.

¹⁰Bahen Ham ma bani sidea songon na bani halak Midian, songon na bani si Sisera, ampa si Jabin i lambung ni Bah Kison, [1041]

¹¹ai ma na bois dohorhon Endor, gabe napu ni juma ni sidea.

¹²Bahen Ham ma dompak na sangap ni sidea songon na bani si Oreb pakon si Zeb, anjaha ganup raja ni sidea songon si Zeba pakon si Salmuna, [1042]

¹³na mangkatahon ai, “Buat hita ma sagala ianan ni Naibata banta!” [1043]

¹⁴Ham Naibata, bahen Ham ma sidea songon tompoh-tompoh, songon lapa-lapa i lobei ni logou.

¹⁵Songon apuy, na manutung harangan, songon gara ni apuy, na mamonsongkon dolog,

¹⁶sonai ma usir Ham sidea marhitei halisungsung-Mu, anjaha songgoti Ham sidea marhitei haba-haba-Mu.

¹⁷Gok ma bohi ni sidea bahen Ham bani habadoron, ase pindah-pindah sidea bani goran-Mu, Ham Jahowa. [1044]

¹⁸Sai bador anjaha tarsonggot ma sidea sadokah ni dokahni, maila anjaha magou ma sidea, [1045]

¹⁹ase andohar ibotoh sidea, pitah Ham do na margoran Jahowa, Na Tang Sitimbulan i sab tanoh on. [1046]