Read Batak Simalungun PSALMEN 84 Bible Online

PSALMEN 84 - Batak Simalungun bible

PSALMEN 84

¹Bani pambobai koor. Marhasoman Gitit. Humbani ginompar ni si Korah. Sada Psalm.

²Jenges ni in rumah ianan-Mu, Ham Jahowa Zebaot!

³Masihol anjaha ayak do tonduyhu bani alaman ni Jahowa. Marolob-olob do uhurhu pakon dagingku manjumpahkon Naibata na manggoluh in. [1047]

⁴Dingis pe jumpahan jabu do, sonai layang-layang dapotan asar do, bahen ianan ni anakni ilambung ni anjapanjap-Mu. Ham Jahowa Zebaot, Rajangku anjaha Naibatangku. [1048]

⁵Martuah do halak na marianan i rumah-Mu, sai Ham do pujion ni sidea. Sela. [1049]

⁶Martuah do halak, na marhagogohon ibagas Ham, na marugas laho hu rumah-Mu. [1050]

⁷Anggo ibolus sidea lombang Baka, gabe ianan bah tubuh do ai bani sidea; tongon, udan mula-mula do na mangarbahisi. [1051]

⁸Lambin ganda do gogoh ni sidea, paima das sidea hu lobei ni Naibata i Sion. [1052]

⁹Ham Jahowa Zebaot, tangihon Ham ma tonggongku, paeleng Ham na pinggol-Mu, Ham Naibata ni si Jakob. Sela. [1053]

¹⁰Kawahkon Ham ma gantarnami, ale Naibata, anjaha tatap Ham ma bohi ni na mininakan-Mu! [1054]

¹¹Tongon, dearan do sadari i alaman-Mu ase saribu ari bani ianan na legan; rahanan do sijaga labah ahu i rumah ni Naibatangku ase marianan i lampolampo ni parjahat. [1055]

¹²Ai mata ni ari ampa gantar do Naibata Jahowa; Ia do sibere idop ni uhur ampa hasangapon; seng iampogi na madear bani halak na bujur marparlahou. [1056]

¹³Ham Jahowa Zebaot, martuah do jolma na marhatengeran Bamu.