Read Batak Simalungun PSALMEN 85 Bible Online

PSALMEN 85 - Batak Simalungun bible

PSALMEN 85

¹Bani pambobai koor. Humbani ginompar ni si Korah. Sada Psalm.

²Ham Jahowa, idop do uhur-Mu ijia bani tanoh-Mu, ipasuang Ham do use si Jakob. [1057]

³Isasap Ham do hajahaton ni bangsa-Mu, irungkub Ham do dousa ni sidea haganupan. Sela. [1058]

⁴Ipahombun Ham do ringis-Mu, anjaha iampogi Ham do gajag ni gila-Mu.

⁵Sai pasuang Ham ma hanami, Ham Naibata ni haluahonnami, parontihon Ham ma ringis-Mu dompak hanami.

⁶Lanjar do Ham manringis dompak hanami, anjaha toruskonon-Mu do ringis-Mu marsundut-sundut? [1059]

⁷Ai lang be ulakan-Mu pagoluh hanami, ase marmalas ni uhur bangsa-Mu ibagas Ham? [1060]

⁸Patidak Ham ma hu bennami, Ham Jahowa, idop ni uhur-Mu, anjaha useihon Ham ma bennami pangurupion-Mu.

⁹Sai tangihononku do atap aha na hinatahon ni Naibata Jahowa, ai hadameion do hata-Ni dompak bangsa-Ni pakon bani na hinaholongan-Ni, asal ma ulang mulak sidea bani haotoon. [1061]

¹⁰Tongon, donok do pangurupi-Ni bani na mangkabiari-Si, tongon, marianan do hamuliaon-Ni bani tanohnami. [1062]

¹¹Idop ni uhur pakon hasintongan sai pajumpah do, anjaha hapintoron pakon hadameion marsisummahan. [1063]

¹²Hasintongan martumbor hun tanoh, anjaha hapintoron manatap hun atas langit. [1064]

¹³Tongon, Jahowa sandiri do mambere na madear, anjaha tanohnami mambere gogohni. [1065]

¹⁴Hapintoron do mardalan i lobei-Ni, anjaha hadameion mangirikkon langkah-langkah-Ni. [1066]