Read Batak Simalungun PSALMEN 89 Bible Online

PSALMEN 89 - Batak Simalungun bible

PSALMEN 89

¹Doding podah humbani si Etan, halak Esrahi.

²Sai dodingkononku do idop ni uhur ni Jahowa sadokah ni dokahni, pabotohkononku do hasintongan-Mu marhitei pamanganku, marsundut-sundut. [1097]

³Ai nimu do, “Totap do idop ni uhur-Hu sadokah ni dokahni, anjaha songon jonam ni langit do hasintongan-Ku.” [1098]

⁴Domma Hubahen padan bani na pinilih-Ku, domma Hubijahon bani juakjuak-Ku si Daud. [1099]

⁵Patotapon-Ku do ginomparmu sadokah ni dokahni, anjaha hotakmu pajongjongon-Ku marsundut-sundut. Sela. (2 Sam. 7)

⁶Jadi pujion ni langit ma halongangan-Mu, Ham Jahowa, sonai hasintongan-Mu bani tumpuan ni halak na ma pansing. [1100]

⁷Ai ise ma i langit na doskon Jahowa, ise ma parnagori atas na songon Jahowa? [1101]

⁸Sihabiaran do Naibata i tongah-tongah ni malekat na ma pansing, anjaha jombut bani sagala ma manlioti-Si. [1102]

⁹Ham Jahowa, Naibata Zebaot, ise ma na songon Ham? Markuasa do Ham, ale Jahowa, anjaha hasintongan-Mu manginggoti Ham. [1103]

¹⁰Ham do na manggomgom gunsang ni laut, anggo naik gilumbangni Ham do na paminopkon. [1104]

¹¹Ham do na manropuki Rahab songon halak na tinampul, ipaerap Ham do munsuh-Mu marhitei tangan-Mu na gogoh in. [1105]

¹²Gok Bamu do nagori atas, gok Bamu do homa tanoh on; dunia on pakon sagala isini, Ham do na pajonamkon. [1106]

¹³Utara pakon dangsina Ham do na manompasi; Tabor pakon Hermon marolob-olob halani goran-Mu.

¹⁴Marbotokon na gogoh do Ham, gogoh do tangan-Mu anjaha timbul siamun-Mu. [1107]

¹⁵hapintoron pakon uhum do onjolan ni hotak-Mu, idop ni uhur pakon hasintongan do jongjong i lobei-Mu. [1108]

¹⁶Martuah ma bangsa na mambotoh marolob-olob, na mardalan ibagas sondang ni bohi-Mu, Ham Jahowa.

¹⁷Marhitei goran-Mu do marolob-olob sidea ganup ari, anjaha marhitei hapintoron-Mu timbul sidea.

¹⁸Ai Ham do hamuliaon ni gogoh ni sidea. anjaha marhitei rosuh-Mu gijang tanduknami.

¹⁹Ai Jahowa do simada gantarnami, humbani na pansing ni Israel do rajanami. [1109]

²⁰Na ijia marsahap do Ham marhitei panonggoran hubani hinaholongan-Mu, Nimu, “Domma Huondoskon sortali bani sada puanglima, domma Hupabangkit sada na pinilih humbani bangsa in.” [1110]

²¹Domma jumpah Ahu juakjuak-Ku si Daud, domma Huminaki ia marihitei minak-Ku na ma pansing; [1111]

²²tungkolon ni tangan-Ku do ia, tongon, pargogohan ni botokon-Ku do ia. [1112]

²³Seng anjai dorabon ni munsuh ia, anjaha seng anjai odoh-odohon ni parjahat ia.

²⁴Tapi rosakan-Ku do munsuhni i lobei ni, anjaha raseihonon-Ku do na mandomdomisi.

²⁵Hasintongan ampa idop ni uhur-Hu do mangkasomanisi, anjaha marhitei goran-Ku pagijangon do tandukni. [1113]

²⁶Bahenon-Ku do tanganni manguasai laut, tanganni siamun manguasai bah mardalan. [1114]

²⁷Dilohononni do hu Bangku, “Bapangku do Ham, Naibatangku ampa batu gingging ni hatuahonku!” [1115]

²⁸Tongon, bahenon-Ku do ia anak sikahanan, timbulan humbani raja-raja na i tanoh on. [1116]

²⁹Ronsi sadokah ni dokahni do patotapon-Ku idop ni uhur-Hu bani, anjaha totap do padan-Ku bani. [1117]

³⁰Patongtongon-Ku do ginomparni ronsi sadokah ni dokahni, anjaha hotakni sadokah dong langit. [1118]

³¹Anggo itadingkon anak-anakni titah-Ku, anjaha seng marpangabak sidea bani aturan-Ku,

³²anggo ibutaki sidea tanoh-Ku, anjaha parentah-Ku seng idalankon,

³³jadi luluhonon-Ku do panlanggaron ni sidea ai marhitei lonsing-lonsing, ampa hajahaton ni sidea ai marhitei libas-libas, [1119]

³⁴tapi anggo idop ni uhur-Hu seng anjai osoron-Ku hun bani, anjaha hasintongan-Ku seng anjai oseion-Ku. [1120]

³⁵Seng elukkonon-Ku padan-Ku, anjaha na luar humbani pamangan-Ku seng anjai ubahon-Ku. [1121]

³⁶Domma ongga marbulawan ahu marhitei hapansingon-Ku, seng anjai marladung Ahu bani si Daud. [1122]

³⁷Totap do sadokah ni dokahni ginomparni, anjaha songon mata ni ari hotakni i lobei-Hu; [1123]

³⁸manongtong do ia songon bulan, jonam sadokah dong langit. Sela. [1124]

³⁹Hape sonari itulak anjaha iambukkon Ham do, manringis do Ham dompak na mininakan-Mu. [1125]

⁴⁰Iparnalang Ham do padan na dompak juakjuak-Mu, hiri do das hu tanoh ibahen Ham sortalini.

⁴¹Iruntas Ham do sagala tembokni, marumbak ibahen Ham batar-batarni.

⁴²Isamun halak pamontas do ia, gabe siapason bani bangsa simbalogni. [1126]

⁴³Ipagijang Ham do tangan siamun ni imbangni, marmalas ni uhur do ganup munsuhni ibahen Ham. [1127]

⁴⁴Marbalik do ibahen Ham mata ni podangni, seng tahan ia jongjong bani parmunsuhan. [1128]

⁴⁵Iilohkon Ham do sinalsalni, anjaha hotakni itunggalingkon Ham hu tanoh.

⁴⁶Ipapondok Ham do ari-ari ni haposoonni, anjaha irungkub Ham ia bani habadoron. Sela. [1129]

⁴⁷Sadiha dokah nari, Ham Jahowa, ponopkonon-Mu lalab diri-Mu, anjaha gajag lalab songon apuy ringis-Mu? [1130]

⁴⁸Ingat Ham ma, tongkin ni in goluh on, sonaha podasni salpu jolma tinompa-Mu in? [1131]

⁴⁹Ija ma dong jolma manggoluh na so idahonni hamatean, anjaha na boi paluahkon tonduyni hun tangan ni nagori toruh? Sela. [1132]

⁵⁰Ija do nuan, Tuhan, hinalayak-Mu ondi, na dob binijahon-Mu bani si Daud marhitei hasintongan-Mu? [1133]

⁵¹Ingat Ham ma, Tuhan, habadoron ni juakjuak-Mu; hupausung-usung do bani tontonku apas-apas ni bangsa-bangsa,

⁵²ai ma niapaskon ni sidea, Ham Jahowa; ipahiri sidea do bokas ni na mininakan-Mu. [1134]

⁵³Napuji ma Jahowa sadokah ni dokahni! Amen! nai ma amen! [1135]