Read Batak Simalungun PSALMEN 9 Bible Online

PSALMEN 9 - Batak Simalungun bible

PSALMEN 9

¹Bani pambobai koor. Inggouni: Almaut Laben. Psalm ni si Daud.

²Sai pujionku do Ham Jahowa humbani gok ni uhurhu, sai baritahononku do sagala halongangan na binahen-Mu in. [80]

³Marmalas ni uhur anjaha marolob-olob do ahu Bamu, dodingkononku do goran-Mu, Ham Sitimbulan in;

⁴halani ai manginsurut do munsuhku, mangkajurgang anjaha bois i lobei-Mu.

⁵Tongon, Ham do sipatorsa uhum ampa paharangku, hundul bani hotak-Mu do Ham manguhumi, Ham panguhum na pintor. [81]

⁶Hona hata do ibahen Ham sipajuh begu-begu, iagouhon Ham parjahat, anjaha isasap Ham do goran ni sidea sadokah ni dokahni. [82]

⁷Bois do munsuh in, marongrong lalab, maseda do sagala huta ibahen Ham, magou pardingat bani sidea. [83]

⁸Tapi, ia Jahowa totap do marparatas ronsi sadokah ni dokahni; ipajongjong do hotak-Ni laho manguhumi. [84]

⁹Ia do manguhum dunia on ibagas hapintoron, anjaha ipapintor uhum bani sagala bangsa sintong-sintong. [85]

¹⁰Ase Jahowa do batar-batar bani na hona dorun, anjaha batar-batar bani panorang hasosakan. [86]

¹¹Halani ai martenger ni uhur Bamu do sagala na mananda goran-Mu, ai seng ongga itadingkon Ham sagala na mangindahi Ham, ale Jahowa. [87]

¹²Dodingkon ma Jahowa, na marparatas i Sion, ambilankon ma pambahenan-Ni bani sagala bangsa; [88]

¹³ai Ia do siluluhon daroh, anjaha seng lupa Ia bani dilo-dilo ni halak na madoyuk. [89]

¹⁴Maidop ma uhur-Mu bangku, Ham Jahowa, kawahkon Ham ma hadoyukonku halani na mandomdomi ahu; Ham do na mandokdok ahu humbani horbangan ni hamatean, [90]

¹⁵ase hubaritahon sagala puji-pujian Bamu bani horbangan ni boru Sion, anjaha marolob-olob ahu halani parpaluah-Mu. [91]

¹⁶Tarrobung do sipajuh begu-begu bani godung na binahenni, anjaha sangkut naheini bani siding na tinaonni ponop. [92]

¹⁷Ipatandahon Jahowa do diri-Ni, idalankon do uhum, marhitei pambahenan ni tangan-Ni tarsangkut parjahat. Higajon. Sela. [93]

¹⁸Sai turun do hu nagori toruh halak parjahat, haganup sipajuh begu-begu na mangkalupahon Naibata. [94]

¹⁹Seng anjai lalab hona lupahon halak na masombuh, anjaha seng lalab magou pangarapan ni halak na hona dorun. [95]

²⁰Jongjong ma Ham Jahowa, ase ulang sai mangenjeng jolma in, sai hona uhum ma sipajuh begu-begu i lobei-Mu. [96]

²¹Pasogop Ham ma songgot-songgot bani sidea, Ham Jahowa, ase iahapkon sipajuh begu-begu jolma do sidea. Sela! [97]