Read Batak Simalungun PSALMEN 90 Bible Online

PSALMEN 90 - Batak Simalungun bible

PSALMEN 90

¹Tonggo ni si Musa, juakjuak ni Naibata. Ale Tuhan, Ham do haporusannami marsundut-sundut.

² Paima tubuh dolog-dolog, paima iadongkon tanoh pakon dunia on, domma adong hinan Ham, ale Naibata, humbani sadokah ni dokahni ronsi sadokah ni dokahni. [1136]

³Suang do jolma in gabe orbuk ibahen Ham, Nimu, “Mulak ma hanima, ale anak ni jolma!” [1137]

⁴Ai saribu tahun bani pangidah-Mu doskon ari nantuari na dob salpu do ai, songon sada horin borngin-borngin. [1138]

⁵Iayub Ham do sidea, salpu songon nipi do sidea. Songon poyon-poyon na maratah do sidea: [1139]

⁶sogod martumbor anjaha marbunga, hape bodari melus anjaha maloslos. [1140]

⁷Tongon, bois do hanami halani ringis-Mu, anjaha binahen ni gila-Mu magou do hanami. [1141]

⁸Ipatalar Ham do hajahatonnami i lobei-Mu, anjaha dousanami na ponop bani haliharon ni bohi-Mu. [1142]

⁹Tongon, salpu do ganup ari-arinami ibahen ringis-Mu, anjaha tahun-tahun ni goluhnami masab songon sada hoih.

¹⁰Tahun ni goluhnami sibar pitu puluh do, anggo margogoh das ualuh puluh tahun; bueinan do ai marhangaluton anjaha marhasunsahan, ai podas tumang do ai salpu, songon na habang do hanami. [1143]

¹¹Ise ma na mananda banggal ni ringis-Mu, anjaha ise ma na marhabiaran Bamu domu hubani gajag ni gila-Mu?

¹²Ajari Ham ma hanami mamilangi ari-arinami, ase dapotan uhur na pentar hanami. [1144]

¹³Marpangulaki ma uhur-Mu, Ham Jahowa! Sadiha dokah nari? Maidop ma uhur-Mu bani juakjuak-Mu.

¹⁴Pabosur Ham ma hanami sogod-sogod bani idop ni uhur-Mu, ase boi marolob-olob anjaha marmalas ni uhur hanami bani ganup ari-ari ni goluhnami. [1145]

¹⁵Pamalas Ham ma uhurnami nansa dokah ni ari niarsik-Mu hanami, nansa dokah ni tahun hamagouan na nidageinami.

¹⁶Patalar Ham ma sagala horja-Mu bani juakjuak-Mu, ampa hamuliaon-Mu bani ginomparni. [1146]

¹⁷Sai sogop ma hu banta habasaron ni Tuhan Naibatanta, anjaha ipatotap ma horja ni tanganta, tongon, sai ipatotap ma horja ni tanganta. [1147]