Read Batak Simalungun PSALMEN 92 Bible Online

PSALMEN 92 - Batak Simalungun bible

PSALMEN 92

¹Sada Psalm. Doding bani Ari Sabat.

² Na madear do mamuji Jahowa ampa mandodingkon goran-Mu, Ham ale Sitimbulan, [1161]

³ mangambilankon idop ni uhur-Mu sogod ampa hasintongan-Mu borngin, [1162]

⁴marhasoman parugas sisapuluh tali pakon arbap, iirikkon sora ni husapi. [1163]

⁵Ai ipamalas Ham do uhurhu, Ham Jahowa marhitei pambahenan-Mu, marolob-olob do ahu mangidah jadi-jadian ni tangan-Mu.

⁶Banggal ni in pambahenan-Mu, Ham Jahowa, bagas tumang do pingkiran-Mu. [1164]

⁷Jolma na bodoh seng iarusi anjaha jolma na lontong seng iartihon ai.

⁸Age pe martumbor parjahat songon poyon-poyon, anjaha marbunga sagala sihorjahon na masambor, sisedahonon do sidea sadokah ni dokahni. [1165]

⁹Tapi anggo Ham, ale Jahowa, timbul do ronsi sadokah ni dokahni. [1166]

¹⁰Tongon, munsuh-Mu, Ham Jahowa, tongon, munsuh-Mu magou do; mambur merap do sagala sihorjahon hajahaton.

¹¹Tapi ipagijang Ham do tandukku songon tanduk ni ursa, iminaki Ham do ahu bani minak na bayu; [1167]

¹²sombuh do matangku mangidah pardabuh ni munsuhku, anjaha megah pinggolhu manangar parmagou ni siimbang ahu. [1168]

¹³Halak parpintor martumbor do songon kurma, anjaha martunas songon hayu ares i Libanon. [1169]

¹⁴Sidea na sinuan i rumah ni Jahowa, sai marbunga do sidea bani alaman ni Naibatanta; [1170]

¹⁵marbuah do sidea age dob matua, tongtong tabun anjaha maratah, [1171]

¹⁶laho mangambilankon, “Pintor do Jahowa, Batu Ginggingku, anjaha seng dong hagedukon Bani.” [1172]