Read Batak Simalungun PSALMEN 94 Bible Online

PSALMEN 94 - Batak Simalungun bible

PSALMEN 94

¹Ham Naibata Jahowa sipambalas, Ham Naibata, sipambalas, roh ma Ham ibagas sondang-Mu! [1177]

²Jongjong ma Ham, ale Sipanguhum tanoh on, balaskon Ham ma pambahenan ni sigijang uhur. [1178]

³Piga dokah on parjahat in, Ham Jahowa, piga dokah on, sai marsurak-surak parjahat in? [1179]

⁴Sai hata hajungkaton do isahapkon sidea, sai toal do parsahap ni ganup sihorjahon hajahaton. [1180]

⁵Sai irojati sidea do bangsa-Mu, Ham Jahowa, sai iodoh-odoh do parbagianan-Mu. [1181]

⁶Ibunuhi sidea do na mabalu pakon halak panginsolat, anjaha isongkiki halak na tading maetek, [1182]

⁷nini, “Seng ididah Jahowa in, anjaha seng sai ipabotoh-botoh Naibata ni si Jakob.” [1183]

⁸Botoh ma, ale halak na oto i tongah-tongah ni bangsa in, anjaha hanima halak na lontong, antigan pe maruhur hanima? [1184]

⁹Ia, sisuan pinggol, mintor ma lang marpanangar? Ia, sijadihon mata, mintor ma lang marpangidah? [1185]

¹⁰Ia, siajar bangsa-bangsa, mintor ma lang manguhum? Ia, sipangajari jolma, mintor ma lang marpambotoh? [1186]

¹¹Jahowa do sitanda pingkiran ni jolma; tongon, haganupan ai logou do. [1187]

¹²Martuah do halak ni niajar-Mu, Ham Jahowa, anjaha na pinodahan-Mu marhitei titah-Mu. [1188]

¹³laho pasonangkonsi bani ari na jahat, ronsi siap ihurak tanoman bani parjahat. [1189]

¹⁴Halani, seng anjai tulakon ni Jahowa bangsa-Ni, anjaha seng tadingkonon-Ni parbagianan-Ni. [1190]

¹⁵ Tongon, sai mulak hu hapintoron do uhum, anjaha ihutkonon ni sagala na pintor uhur do in. [1191]

¹⁶Ise ma nani hasomanku laho mangimbang parjahat? Ise ma nani sipangurupi bangku manlawan sihorjahon hajahaton?

¹⁷Ambit lang Jahowa sipangurupi bangku, narus ma marianan tonduyhu bani ianan na malungun. [1192]

¹⁸Anggo hupingkir, “Jiris ma naheihu, jadi itungkol parontou ni uhur-Mu do ahu, Ham Jahowa.” [1193]

¹⁹Sanggah lutu pingkiranku ibagas, jadi apoh-apoh-Mu do pasonang uhurhu. [1194]

²⁰Mintor sapanriah ma Ham pakon halak sihunduli hotak hamagouan, na mamingkiri hamagouan marsipakulah-kulahkon habonaron? [1195]

²¹Iparburu sidea do hosah ni parpintor, anjaha idabuh uhum bani daroh na so marpipot. [1196]

²²Tapi Jahowa do batar-batar bangku, anjaha Naibatangku dolog batu, haporusan bangku.

²³Ia do mambalaskon bani sidea hajahaton ni sidea ai; boiskonon-Ni do sidea halani hajahaton ni sidea. Tongon, boiskonon ni Jahowa Naibatanta do sidea.