Read Batak Simalungun PSALMEN 96 Bible Online

PSALMEN 96 - Batak Simalungun bible

PSALMEN 96

¹Dodingkon nasiam ma sada doding na bayu bani Jahowa, dodingkon nasiam ma Jahowa, ale ganup tanoh on! [1205]

²Dodingkon nasiam ma Jahowa, puji ma goran-Ni; ambilankon nasiam ma hatuahon-Ni, ganup ari! [1206]

³Baritahon nasiam ma i tongah-tongah ni sipajuh begu-begu hamuliaon-Ni, i tongah-tongah ni bangsa-bangsa halongangan binahen-Ni ai. [1207]

⁴Ai banggal do Jahowa, talup tumang sipujion, marjumbalang do Ia i atas ni sagala naibata. [1208]

⁵Ai na lang do naibata ni bangsa-bangsa, tapi Jahowa do sijadihon langit. [1209]

⁶Hasangapon ampa hamuliaon do i lobei-Ni, hagogohon pakon hatunggungon do bani ianan-Ni na ma pansing in. [1210]

⁷Bere nasiam ma bani Jahowa, ale bangsa-bangsa, bere nasiam ma bani Jahowa hamuliaon pakon hagogohon. [1211]

⁸Bere nasiam ma bani Jahowa hamuliaon ni goran-Ni, boan nasiam ma galangan, masuk ma nasiam bani alaman-Ni! [1212]

⁹Manrogop ma nasiam i lobei ni Jahowa marpakeian na ma pansing, hitir-hitir ma i lobei-Ni, ale ganup tanoh on!

¹⁰Hatahon ma i tongah ni bangsa parbegu, “Jahowa do Raja; Ia do na pajonamkon dunia on, seng anjai dugur; uhumon-Ni do sagala bangsa ibagas hapintoron.” [1213]

¹¹Marmalas ni uhur ma langit anjaha marolob-olob ma tanoh on, marhasak ma laut pakon pangisini. [1214]

¹²Marmalas ni uhur ma ladang ampa ganup na ijai, age sagala hayu na i harangan marolob-olob ma, [1215]

¹³i lobei ni Jahowa, ai tongon roh ma Ia manguhum tanoh on. Uhumon-Ni ma dunia on ibagas hapintoron ampa bangsa-bangsa ibagas hasintongan-Ni. [1216]