Read Batak Simalungun PODAH 1 Bible Online

PODAH 1 - Batak Simalungun bible

PODAH 1

¹On do podah ni si Salomo, anak ni si Daud, raja ni Israel, [1]

²ase ibotoh halak hapentaran pakon pangajaran, ase iarusi hata hapantason,

³ase tarjalosi pangajaran na madear, hapintoron, uhum pakon habonaron,

⁴laho mambere hapantason bani halak sibulus uhur, habotohon pakon panimbangion bani anak garama.

⁵Halak na pentar pe itangihon ma ai, ase tambah habotohon bani, anjaha halak na maruhur dapotan pangajarion, [2]

⁶laho mangartihon podah pakon limbaga, hata ni halak na pentar pakon hutinta ni sidea.

⁷ Biar mangidah Jahowa do parmulaan ni habotohon; halak na bodoh teos do uhurni bani hapentaran pakon pangajaran. [3]

⁸ Tangihon ma, ale anakku, pangajarion ni bapamu, ulang ma buangkon podah ni inangmu. [4]

⁹Ai rudang na majenges do ai bani ulumu, anjaha sinongkok bani borgokmu. [5]

¹⁰ Ale anakku, anggo iajar-ajari pardousa ho, ulang ma tangihon. (Ps. 11)

¹¹Porini ihatahon sidea, “Eta, irikkon ma hanami monggop laho manduruskon daroh, gompangi hita ma halak na so marpipot, age seng dong halani.

¹²Bolur hita ma sidea songon pambahen ni nagori toruh, manggoluh anjaha hibul, songon halak na dob tuad hu tanoman.

¹³Bagei ma arta na maharga dapot hita holi, boi ma igoki hita jabunta bani barang rampasan.

¹⁴Dihut do ho marbagian rap pakon hanami, sisada parduitan do hita haganup.”

¹⁵Ale anakku, ulang ma ho ra sadalanan pakon sidea, padaoh ma naheimu humbani dalan ni sidea;

¹⁶ai dompak hasamboron do marlintun nahei ni sidea, tarolos do sidea manduruskon daroh. [6]

¹⁷Ai soya do itaon puhot i lobei ni mata ni manuk-manuk,

¹⁸anjaha sidea ai, daroh ni sidea sandiri do nionggopanni, anjaha hosahni sandiri do ginompanganni.

¹⁹Sonai do masa bani halak na hisapan bani pansarian, hosahni sandiri do hona buat.

²⁰Dilo-dilo do hapentaran ai i alaman, ipamaling do sorani i tiga; [7]

²¹bani ianan na ramei taur-taur do Ia, anjaha bani horbangan ni huta ai iluarhon hatani. [8]

²²Piga dokah nari do, ale halak na oto, holong uhurnima bani haotoon? Piga dokah nari do, ale halak siparrehei, marosuh hanima manrehei, anjaha halak na oto magigi bani habotohon?

²³Dompakkon hanima ma pangajaranku, tonggor ma, useihononku do Tonduyhu, anjaha pabotohkononku do hatangku bennima.

²⁴Halani dilo-dilo ahu, tapi seng ra hanima manangihon, husurdukkon tanganku, tapi sahalak pe lang na parduli, [9]

²⁵itulak hanima do tene haganup podahku, anjaha seng pot hanima bani pangajarionku,

²⁶halani ai partatawaonku do hanima bani hamagouannima, anjaha mandoruni bani pangonai ni songgot-songgot bennima, [10]

²⁷bani na mangonai bennima songgot-songgot songon haba-haba, bani na roh bennima hasedaon songon halisungsung, bani na sogop bennima hasosakan ampa hagobiron.

²⁸Jadi dilo-dilo ma sidea bangku, tapi seng hubalosi, pindah-pindah sidea bangku, tapi seng jumpah sidea ahu. [11]

²⁹Halani magigi sidea bani habotohon, anjaha seng ipilih biar bani Jahowa,

³⁰seng pot sidea bani podahku, anjaha itulak ganup pangajarionku,

³¹halani ai, maningon panganon ni sidea do buah ni parlahouni, anjaha bosur sidea bani ranggianni. [12]

³²Ai panundalion ni halak na oto do gabe hamatean bani, anjaha halanseion ni halak na lontong parsedahon dirini. [13]

³³Tapi atap ise na manangihon ahu, marsonang-sonang do ia marianan, seng anjai gobir ia dompak songgot-songgot ni hamagouan. [14]