Read Batak Simalungun PODAH 10 Bible Online

PODAH 10 - Batak Simalungun bible

PODAH 10

¹Podah ni si Salomo. Anak na maruhur pamalas uhur ni bapani, tapi anak na bodoh papusok uhur ni inangni, [117]

²Arta na dapot humbani hajahaton, seng marguna, tapi hapintoron do na paluahkon humbani hamatean. [118]

³Seng ipaturut Jahowa loheian parpintor, tapi anggo hisap ni halak parjahat isundati do. [119]

⁴Tangan parrayoh mangkorhon hamiskinon, tapi tangan na ringgas mambahen bayak. [120]

⁵Halak na ringgas patumpu-tumpuhon bani musim milas, ai ma siparuhur; tapi halak na modom-modom musim sabion, parohkon habadoron.

⁶Pasu-pasu do sogop bani ulu ni halak parpintor, tapi gok hagedukon do babah ni halak parjahat.

⁷Mardingat halak parpintor parohkon pasu-pasu, tapi bau do barita ni halak parjahat. [121]

⁸Halak siparuhur ra do manjalo pangajaran, tapi halak parsahap haotoon maningon madabuh do.

⁹Sonang do halak na pitah marparlahou, tapi halak na geduk marparlahou sai tardapot do.

¹⁰Halak na paserleng matani parohkon na maborit, tapi halak na torang-torang maminsang mangkorhon hadearon. [122]

¹¹Bah hagoluhan do pamangan ni halak parpintor, tapi gok hagedukon do pamangan ni halak parjahat. [123]

¹²Domdom do mamuhoi paringoran, tapi irungkub holong ai do sagala hasalahan. [124]

¹³Bani bibir ni halak na pantas do dapot hapentaran, tapi lonsing-lonsing do patut mangonai bani gurung ni halak na hurang uhur.

¹⁴Halak na pentar pagugun habotohon, tapi pamangan ni halak na bodoh ai ma hamagouan na mangondam.

¹⁵Arta ni halak na bayak, huta na toguh do ai bani, tapi hasedaon do hamiskinon ai bani halak na masombuh. [125]

¹⁶Pansarian ni halak parpintor mambobai hu hagoluhan, tapi na sinari ni halak parjahat hubagas dousa. [126]

¹⁷Mardalan bani dalan hagoluhan do halak siramotkon pangajaran, tapi kahou do halak na so parduli bani pinsang-pinsang. [127]

¹⁸Halak pardomdom, ai ma parbibir ladung, tapi halak sipangkatai ai ma halak na bodoh.

¹⁹Lang tarbahen lang dong salah bani hata na buei, tapi halak na manrantei bibirni ai ma na pandei. [128]

²⁰Doskon pirak pilihan do dilah ni halak parpintor, tapi pingkiran ni halak parjahat seng sadiha hargani.

²¹Bibir ni halak parpintor do sipambobai bani buei halak, tapi matei do halak na bodoh ibagas haotoonni.

²² Pasu-pasu ni Jahowa do mambahen bayak, anjaha seng pala marhasoman halojaon. [129]

²³Gurou-gurou do bani halak na oto mandalankon hajahaton, tapi hapentaran do rosuh ni halak na maruhur. [130]

²⁴Na hinabiaran ni halak parjahat, ai do sogop hu bani, tapi ibere do bani halak parpintor, na pinindo ni uhurni. [131]

²⁵Anggo montas haba-haba, bois do parjahat, tapi totap do lalab halak parpintor.

²⁶Doskon na migar bani ipon ampa timus bani mata, sonai do parrayoh bani na marsuruhsi.

²⁷Biar bani Jahowa do paganjang umur, tapi ari-ari ni halak parjahat ipapondok do. [132]

²⁸Pangarapan ni halak parpintor paroh malas ni uhur, tapi na lang do pinaima-ima ni halak parjahat. [133]

²⁹Batar-batar do Jahowa bani halak na daulat, tapi hamagouan do bani halak sihorjahon hajahaton. [134]

³⁰Seng anjai dugur halak parpintor, tapi halak parjahat seng iankononni tanoh in. [135]

³¹Pamangan ni halak parpintor patubuh hapentaran, tapi dilah pargeduk maningon rotapon do. [136]

³²Bibir ni halak parpintor mambotoh na madear, tapi pamangan ni parjahat mansedahon do.