Read Batak Simalungun PODAH 12 Bible Online

PODAH 12 - Batak Simalungun bible

PODAH 12

¹Halak na mangkarosuhkon sipaingat, ai ma siharosuhkon habotohon, tapi na mangkagigihon pinsang-pinsang, ai ma jolma na bodoh. [157]

²Halak sidear uhur gabe harosuh do bani Jahowa, tapi halak paruhur jahat hona uhum-Ni do.

³Seng anjai totap jolma sihorjahon hajahaton, tapi jonam do urat ni halak parpintor. [158]

⁴Parinangon na madear sortali do ai bani paramangonni, tapi na sambor parlahouni gilok-gilok na harat-harat do ai ibagas holi-holini. [159]

⁵Pingkiran ni halak parpintor sintong do ai, tapi riah ni halak parjahat ladung do. [160]

⁶Riah ni halak parjahat sihol manduruskon daroh, tapi pamangan ni halak parpintor paluahkon do. [161]

⁷Hona dabuhkon do halak parjahat gabe seng dong be, tapi totap do anggo rumah ni halak parpintor. [162]

⁸Domu hubani hapentaranni do tarpuji sada dalahi, tapi parakal-akal hona apasan do.

⁹Dearan do gabe halak na maetek, na mannunuti horjani sandiri, humbani na pajuntul-juntulhon diri, hape hurangan sipanganon.

¹⁰Ibotoh halak parpintor do uhur ni pinahanni, tapi uhur ni halak parjahat kejam do. [163]

¹¹Halak sihorjaon jumani sungkupan do bani sipanganon, tapi halak na paihut-ihut na so marguna, halak na bodoh do. [164]

¹²Sura-sura ni halak parjahat sihol mambahen hajahaton, tapi urat ni halak parpintor parohkon buah. [165]

¹³Hona tangkap do halak parjahat marhitei lepak ni parsahapni, tapi sai maluah do halak parpintor humbani hasosakanni. [166]

¹⁴Marhitei buah ni parsahapni do bosuran halak bani na madear, anjaha hinorjahon ni tanganni mulak hu bani. [167]

¹⁵Dalan ni halak na bodoh, pintor do ai ninuhurni, tapi halak na manangihon sipaingat, ai ma na maruhur.

¹⁶Halak na bodoh mintor do ipataridahkon gilani, tapi halak na maruhur irungkub do apas-apas na hu bani.

¹⁷Saksi na sintong manluarhon na sintong, tapi saksi palsu mansahapkon ladung. [168]

¹⁸Sahap ni halak sihampung parsahap songon paniham ni podang do, tapi songon tambat do dilah ni halak na maruhur. [169]

¹⁹Bibir na sintong totap do lalab, tapi dilah sipaoto-oto tongkin do ai hansa.

²⁰Akal-akal do marianan ibagas uhur ni halak partahi-tahi, tapi malas ni uhur do bani halak sisuan damei.

²¹Seng anjai mangonai hamagouan bani halak parpintor, tapi halak parjahat igoki hasunsahan do.

²²Hagigi ni Jahowa do bibir siparladung, tapi marosuh do Ia bani sihorjahon hasintongan. [170]

²³Halak na pentar masip do ia pasal habotohonni, tapi halak na bodoh maningtingkon haotoonni. [171]

²⁴Tangan ni halak na ringgas do na marrajai, tapi halak parrayoh gabe sisuruh-suruhan. [172]

²⁵Holsoh ibagas uhur patunduk jolma, tapi parsahap na basar pahinsah uhur. [173]

²⁶Halak parpintor dapotan sampalan, tapi dalan ni halak parjahat mambahensi kahou.

²⁷Halak parrayoh seng dapotan buruanni, tapi lambin bayak do anggo halak na ringgas. [174]

²⁸Bani dalan hapintoron do jumpah hagoluhan, tapi dalan na masambor manuju hu hamatean.