Read Batak Simalungun PODAH 13 Bible Online

PODAH 13 - Batak Simalungun bible

PODAH 13

¹Anak na pentar itangihon do pangajaran ni bapani, tapi halak sipanrisai seng ipardulihon pinsang-pinsang. [175]

²Humbani buah ni pamanganni do panganon ni halak hadearon, tapi halak sipangeluk hisapan do bani odoh-odoh. [176]

³Halak sirajai pamanganni, goluhni do niramotkonni, tapi halak siganjang dilah maseda do. [177]

⁴Sai marsura-surai do halak parrayoh, hape soya-soya do; tapi halak na ringgas sai dapotan do bani pinarsinta ni uhurni. [178]

⁵Magigi do halak parpintor bani hata ladung, tapi halak parjahat sambor anjaha butak do pambahenanni.

⁶Hapintoron do na manramotkon halak na daulat marparlahou, tapi hajungkaton do na mambahen madabuh pardousa. [179]

⁷ Adong do halak na pakulah bayak ia, age pe seng dong bani, dong homa, ibahen ia songon na miskin, hape marnah na dong do. [180]

⁸Habayakonni do ipakei na bayak manobus hosahni, tapi halak na musil seng tarpaluahsi dirini.

⁹Sondang ni halak parpintor marsinalsal do, tapi miloh do suluh ni halak parjahat. [181]

¹⁰Uhur hagijangon patubuhkon paringoran, tapi hapentaran do jumpah bani halak na ra manangihon podah. [182]

¹¹Habayakon na tarolos-olos pinagugun sai surut do, tapi na pinaiduk-iduk lambin tambah do. [183]

¹²Pangarapan na so dapot, paborit uhur; tapi sinta-sinta na dapot, hayu hagoluhan do ai.

¹³Halak na so parduli bani hata, parseda dirini do, tapi sihabiari titah dapotan upah do.

¹⁴Podah ni halak na pentar, ai ma bah hagoluhan, na boi paluahkon humbani siding ni hamatean. [184]

¹⁵Hapentaran na sintong parohkon holong, tapi dalan ni halak sipargeduk gabe hasedaon do bani.

¹⁶Halak na pentar mandalankon ganup horjani ibagas partimbangan, tapi halak na bodoh paidahkon haotoonni. [185]

¹⁷Suruhan na jahat parohkon hamagouan, tapi suruhan hatengeran ni uhur mamboan hamalumon. [186]

¹⁸Hasombuhon pakon habadoron do sogop bani halak situlak pangajaran, tapi gabe marsangap do halak sitangihon pinsang-pinsang. [187]

¹⁹Sinta-sinta na dapot, tuah do ai bani tonduy, tapi sirang humbani hajahaton hagigi do ai bani na oto.

²⁰Marsaor pakon halak na pentar, parohkon hapentaran, tapi maseda do halak na marhasomankon halak na oto.

²¹Hamagouan do na mardakdak pardousa, tapi hadoharon do upah bani halak parpintor.

²²Halak sidear uhur martading-tadingan do ronsi pahompuni, tapi habayakon ni halak pardousa ipagugun do ai bani halak parpintor. [188]

²³Ladang tinombei ni halak na miskin mambere gogohni buei, tapi gati do magou ai halani hagedukon.

²⁴Halak na malang manlonsingkon hotang, anakni do nihagigihonni ijai, tapi na holong uhur bani, ipagirah do mangajarsi. [189]

²⁵Halak parpintor bosur-bosur do mangan, tapi lumei do boltok ni halak parjahat. [190]