Read Batak Simalungun PODAH 14 Bible Online

PODAH 14 - Batak Simalungun bible

PODAH 14

¹Hapentaran ni naboru mambahen dear rumah tanggani, tapi na oto iparseda do marhitei tanganni sandiri. [191]

²Halak na mardalan bani dalan na pintor, mabiar do ai bani Jahowa, tapi halak na geduk pardalanni, mapas do Ia bani.

³Pamangan ni halak na oto do lonsing-lonsing bani gurungni, tapi bibir ni halak na pentar ai do marramotkonsi.

⁴Anggo seng dong lombu na maninggala, lumei do tuangan, tapi buei do sipariamaan marhitei lombu jonggi na gogoh.

⁵Saksi na sintong seng ra marladung, tapi ladung do iluarhon saksi palsu. [192]

⁶Halak sipanrisai mangindahi hapentaran, hape soya do; tapi halak na maruhur urah do dapotan habotohon.

⁷Simbili ma halak na bodoh, ai seng dong jumpah so hata hapentaran hun bani.

⁸Hapentaran ni siparuhur ai ma: ibotoh do dalanni; tapi haotoon ni halak na bodoh pakahouhon do.

⁹Mapas do uhur ni halak na oto bani galangan pardousaon, tapi marosuh do halak parpintor bani ai.

¹⁰Uhur ai do na mambotoh na maborit ibagas dirini, malas ni uhurni pe seng boi ahapkonon ni na legan.

¹¹rumah ni halak parjahat maningon marumbak do, tapi mardohar do lampolampo ni halak parpintor. [193]

¹²Adong do dalan, pintor do ai ninuhur ni halak, hape ujungni gabe dalan hamatean do. [194]

¹³Ibagas tawa pe dong do pusok ni uhur, anjaha bani malas ni uhur mangihut horu ni uhur.

¹⁴Marhitei ulahni sihol ipabosur siparbalik uhurni, tapi sidear uhur marhitei pambahenanni na madear. [195]

¹⁵Halak na bodoh porsaya do bani sagala sahap, tapi halak na maruhur itimbangi do langkah-langkahni.

¹⁶Marhabiaran do halak na maruhur anjaha isimbili do hajahaton, tapi halak na bodoh seng marrantei marparlahou anjaha raus.

¹⁷Halak parringis ihorjahon do habodohon, anjaha ihagigihon halak do partahi-tahi.

¹⁸Halak na oto marrupei bani haotoon, tapi habotohon do sortali ni siparuhur. [196]

¹⁹Tunduk do halak na jahat bani sidear uhur, anjaha halak na jungkat mangindo-indo bani labah ni parpintor.

²⁰Age sindohorni magigi do mangidah halak na masombuh, tapi buei do huan-kuan bani halak na bayak. [197]

²¹Pardousa do halak na mangapasi hasomanni, tapi martuah do halak na marholong ni atei bani na madoyuk. [198]

²²Mintor lang ma kahou halak siuhurhon hajahaton? Tapi idop ni uhur ampa bujur ni uhur do rupei ni sipingkirhon na madear.

²³Ibagas sagala hangaluton adong do untung, tapi sahap simarinjaja parohkon hahurangan. [199]

²⁴Sortali ni siparuhur, ai ma hapentaranni; tapi bani halak na oto haotoonni do jadi rudangni.

²⁵Sipaluah hosah do saksi na sintong, tapi sipangagou do siluarhon ladung. [200]

²⁶Biar bani Jahowa do patubuh tenger ni uhur na toguh, anjaha bani anakni pe adong do haporusan. [201]

²⁷Biar mangidah Jahowa do bah tubuh hagoluhan, na mambahen tarsimbili siding ni hamatean. [202]

²⁸Hinabuei ni rayat do hamuliaon bani raja, tapi parsurut ni rayat hasedaon ni na markuasa do ai.

²⁹Halak na nanget manringis ai ma sibuei partimbangan, tapi halak na urah manggila pabanggal haotoon. [203]

³⁰Sipahisar angkula do uhur na lamlam, tapi mangkarat bani holi-holi do uhur simburu. [204]

³¹Siodoh-odoh halak na maetek, sipahiri na manompasi do ia ai; tapi na mangkaholongi halak na masombuh, ai ma na pasangapkon Naibata. [205]

³²Marhitei hajahatonni do maseda halak parjahat, tapi nalom do uhur ni parpintor age bani parmateini.

³³Ibagas uhur ni halak na maruhur marianan do hapentaran, tapi seng dong jumpah ai ibagas uhur ni na bodoh. [206]

³⁴ Habonaran do patimbul sada bangsa, tapi dousa do na mambahen maseda halak.

³⁵Harosuh ni raja do juakjuak na pantas maruhur, tapi mangonai do ringisni bani sihorjahon na masambor. [207]