Read Batak Simalungun PODAH 15 Bible Online

PODAH 15 - Batak Simalungun bible

PODAH 15

¹Balos na lamlam pahombun ringis, tapi hata na kasar mamuhoi gila, [208]

²Dilah ni halak na maruhur mantektekkon habotohon, tapi haotoon do puas humbani pamangan ni halak na bodoh. [209]

³Dompak sab dunia on do pangkawah ni Jahowa, ipardiatei do halak parjahat ampa sidear uhur. [210]

⁴Dilah na lamlam, ai ma hayu hagoluhan; tapi dilah siparladung mambahen maborit uhur. [211]

⁵Halak na oto magigi do bani pangajaran ni bapani, tapi halak na marimbagaskon pinsang-pinsang, ai ma siparuhur. [212]

⁶I rumah ni halak parpintor buei do arta, tapi masese do pansarian ni halak parjahat.

⁷Bibir ni halak na pentar manuan habotohon, tapi seng sonai anggo uhur ni halak na bodoh.

⁸Galangan ni halak parjahat hagigi do ai bani Jahowa, tapi marosuh do Ia bani tonggo ni halak parpintor. [213]

⁹Hagigi ni Jahowa do dalan ni halak parjahat, tapi holong do uhur-Ni bani halak siparayak hapintoron. [214]

¹⁰Pangajaran na parah do mangonai bani halak sipanlembang, anjaha maningon matei do na mangkagigihon pinsang-pinsang. [215]

¹¹Nagori toruh ampa naraka, talar do ai i lobei ni Jahowa, samintolah uhur ni jolma ma lang. [216]

¹²Halak parrisa seng marosuh ia ipaingat, seng ra ia marayak halak na pentar. [217]

¹³Uhur na megah mambahen bohi minar, tapi marhitei uhur na marhoru galek do tonduy. [218]

¹⁴Uhur na pantas mangindahi habotohon, tapi babah ni halak na bodoh mansahapkon haotoon.

¹⁵Bani halak na marhoru sambor do sagala panorang, tapi bani halak siparmalas uhur hira ari pesta do tongtong. [219]

¹⁶Rahanan na otik marhasoman biar bani Jahowa, ase mararta na buei, tapi marhasunsahan. [220]

¹⁷Rahanan do na mangankon lowoh ibagas holong, ase mangankon lombu na mombur ibagas domdom. [221]

¹⁸Halak parringis mamuhoi paringoran, tapi halak parsabar mangintopi partinggilan. [222]

¹⁹Dalan ni halak parrayoh songon hondor duri do, tapi hornop do anggo dalan ni halak parpintor. [223]

²⁰Anak na pentar pamalas uhur ni bapani, tapi halak na oto mapas do ia bani inangni. [224]

²¹Haotoon, malas ni uhur do ai bani na hurang uhur, tapi halak na pantas maruhur, pintor do pardalanni. [225]

²²Sundat do ranggian anggo hurang panriahan, tapi saud do ai anggo buei sipamodahi. [226]

²³Malas ni uhur do ai bani halak anggo hona balosni, anjaha jengesan ai, sangkababah hata na topat bani panorangni.

²⁴Dalan hagoluhan bani halak na maruhur manuju dompak datas, laho manimbili nagori toruh ai.

²⁵rumah ni sigijang uhur iparseda Jahowa do. tapi ipatotap do parbalogan ni naboru na mabalu. [227]

²⁶Hagigi ni Jahowa do riah ni halak parjahat, tapi pansing do hata na madear i lobei-Ni. [228]

²⁷Na parsedahon rumahni sandiri do halak sibuat untung na so tiba dalanni, tapi sai manggoluh do halak sihagigihon sisip. [229]

²⁸Uhur ni halak parpintor ipingkiri do balos sibereonni, tapi humbani pamangan ni halak parjahat marjullak-jullak do hajahaton.

²⁹Daoh do Jahowa humbani halak parjahat, tapi itangihon do tonggo ni halak parpintor. [230]

³⁰Pangkawah na basar pamalas uhur, anjaha barita na madear pahisar holi-holi. [231]

³¹Halak na ra manangihon podah na madear, marianan do ia i tongah-tongah ni halak na maruhur.

³²Halak na manulak podah, dirini do iparseda, tapi na manangihon pangajaran dapotan hapentaran. [232]

³³Biar bani Jahowa ai ma pangajaran, na mambahen pentar, anjaha toruh ni uhur do parlobei ni hasangapon. [233]