Read Batak Simalungun PODAH 16 Bible Online

PODAH 16 - Batak Simalungun bible

PODAH 16

¹Bani jolma do uhur panimbangion, tapi humbani Jahowa do roh sisahapkonon ni dilah. [234]

²Haganup dalanni borsih do ninuhur ni halak, tapi Jahowa do siantan uhur. [235]

³Ondoskon ma bani Jahowa sagala horjamu, ase saud haganup sura-suramu. [236]

⁴Haganup do ijadihon Jahowa domu hubani sura-sura-Ni, age parjahat ai, ase hona uhum. [237]

⁵Hagigi ni Jahowa do halak sigijang uhur; tongon seng anjai lang hona uhum ia. [238]

⁶Marhitei holong ampa habujuron do salosei hasalahan, anjaha marhitei biar bani Jahowa boi do tarsimbili halak hajahaton.

⁷Anggo marosuh Jahowa mangidah parlahou ni sada halak, munsuhni pe ipadamei do hu bani. [239]

⁸Rahanan do na otik ibagas hapintoron, ase pansarian na buei, na so tiba dalanni. [240]

⁹ Uhur ni jolma marpingkir-pingkir pasal dalanni, tapi Jahowa do na manontuhon langkahni. [241]

¹⁰Haputusan na humbani Naibata do bani bibir ni raja, bani paruhuman seng anjai lepak sahapni.

¹¹Kilo ampa timbangan na sintong, Jahowa do simadasi; Ia do na mangadongkon haganup batu timbangan. [242]

¹²Hagigi ni raja, ai ma mangkorjahon hajahaton, ai marhitei hapintoron do totap paratasni. [243]

¹³Harosuh ni raja, ai ma bibir hasintongan, anjaha parsahap na sintong do ihaholongi.

¹⁴Ringis ni raja, suruhan hamatean do ai, tapi mahombun do ai ibahen halak na pentar. [244]

¹⁵Minar ni bohi ni raja pagoluhkon, anjaha halayakonni doskon hombun na manorap bani logou ni ari. [245]

¹⁶Jumpahan hapentaran, dearan do ai humbani omas, dapotan hauhuron, harganan humbani pirak. [246]

¹⁷Dalan ni halak parpintor daoh do ai humbani hajahaton, anjaha na mangkargahon goluhni, ijaga do langkah-langkahni.

¹⁸Parlobei ni hasedaon ai ma gijang ni uhur, anjaha pangenjengon do parlobei ni hadabuhon. [247]

¹⁹Dearan do martoruh ni uhur rapkon na masombuh, ase marbagi taban-taban rap pakon halak na jungkat.

²⁰Halak na marimbagaskon hata, dapotan na madear, anjaha martuah do halak na marhatengeran bani Jahowa. [248]

²¹Halak siparuhur igoran do ai na pentar, anjaha mantin ni panluar mambahen margogoh podah. [249]

²²Bah tubuh hagoluhan do uhur hapantason bani parsimada ai, tapi haotoon do ajar ni halak na bodoh. [250]

²³Uhur ni na pentar papandei pamanganni, anjaha itambah do podah bani bibirni.

²⁴Songon manisan ni lobah do hata na lamlam, mantin bani uhur, anjaha tambar bani holi-holi. [251]

²⁵Adong do dalan, pintor do ai ninuhur ni halak, hape ujungni gabe hamatean do. [252]

²⁶Lohei ni si parhorja manjuljulsi marhorja, ai pamanganni do sipamaksa bani. [253]

²⁷Halak parjahat paranggi-ranggi hamagouan, anjaha songon apuy na gara do bibirni.

²⁸Halak sipanggeori pabolag paringoran, anjaha siparrisai manirang na marhuan. [254]

²⁹Dalahi sipangodoh-odoh pakahou hasomanni, anjaha ibobai do ia bani dalan na so madear. [255]

³⁰Halak na pahirdop-hirdop matani, sipingkiri na masambor do ai, anjaha sipangemngem pamanganni, ai ma sihorjahon hajahaton. [256]

³¹Uban, ai ma sortali hamuliaon, jumpah do ai marhitei goluh na pintor. [257]

³²Dearan do parsabar humbani puanglima, anjaha na marrajai dirini humbani sipatunduk huta. [258]

³³Ihursuk-hursuk pe ruji-ruji ibagas abingan, tapi humbani Jahowa do roh haputusan.