Read Batak Simalungun PODAH 19 Bible Online

PODAH 19 - Batak Simalungun bible

PODAH 19

¹Dearan do halak na masombuh, na pitah marparlahou, humbani halak parbibir ladung, age pe bayak ia. [290]

²Anggo seng marhasoman pamingkirion, seng marguna haringgason, anjaha halak na mangolos-olos mandalankon horjani, maningon lepak do.

³Haotoon ni jolma do parseda dalanni, hape dompak Jahowa marungut-ungut uhurni. [291]

⁴Habayakon do pabuei huan-kuan, tapi halak na masombuh, gari diha-dihani manadingkonsi. [292]

⁵Saksi palsu seng tarbahen lang hona uhum, anjaha sisahapkon ladung seng anjai maluah. [293]

⁶Buei do halak na mamuji-muji na sangap, anjaha ganup do halak gabe huan ni halak siparlayak,

⁷Halak na masombuh, saninani pe haganup sogam do uhurni bani, samintolah ma diha-dihani lang padaoh diri hun bani? [294]

⁸Halak na jumpahan uhur hapantason, holong do uhurni bani goluhni, halak siramotkon pangarusion dapotan tuah do.

⁹Saksi palsu seng anjai lang hona uhum, anjaha sisahapkon ladung magou do. [295]

¹⁰Lang patut halak na oto marsonang-sonang manggoluh, lobih hunjai seng patut jabolon manrrajai raja-raja. [296]

¹¹Hapentaran ni jolma mambahensi nanget manringis, anjaha hamuliaon do ai bani, manalpuhon hasalahan,

¹²Songon paraum ni singa do ringis ni raja, tapi dear ni uhurni songon namur na bani poyon-poyon. [297]

¹³Hasedaon ni bapa do anak na oto, anjaha naboru siparingor songon tiris na manektek torus. [298]

¹⁴Rumah pakon arta, ai ma tading-tadingan humbani na matoras, tapi humbani Jahowa do parinangon na maruhur. [299]

¹⁵Harayohon mambahen dokah modom, anjaha uhur na rahanan soh mambahen gayuran. [300]

¹⁶Halak na mandalankon parentah, ai ma na manramotkon goluhni, tapi maningon matei do na so parduli bani langkah-langkahni. [301]

¹⁷ Na papinjamkon bani Jahowa do halak, na maridop ni uhur bani halak na masombuh, anjaha Ia do na mambaloskon ai bani. [302]

¹⁸Ajar ma anakmu, ai adong ope arapan, tapi ulang roh uhurmu pamatehonsi. [303]

¹⁹Halak siparringis banggal, ia sandiri do na manaron, anggo sihol urupanmu ia, paparahkon do ai.

²⁰Tangihon ma podah, anjaha jalo ma sipaingat, ase lambin pentarni ho use.

²¹Buei do ranggian ibagas uhur ni jolma, tapi sura-sura ni Jahowa do na saud. [304]

²²Hisap-hisap ni jolma pindah-pindah bani paruntungan; tapi dearan do masombuh humbani na gabe siparladung.

²³Biar bani Jahowa do na pagoluhkon, bosur do halak anjaha sonang modom, seng mangonai hamagouan bani. [305]

²⁴Domma ipohul siparrayoh indahanni, tapi rayohan do ia mannahkon ai hu pamanganni. [306]

²⁵Maningon lonsingon do sipanrisai, ase maruhur halak na oto, tapi anggo halak na pantas, ipinsang gelah domma jumpahan habotohon. [307]

²⁶Ise na mangarsik bapani anjaha iusir-usir inangni, ai ma anak sibahen hasamboron ampa habadoron.

²⁷Anggo iparontihon ho, ale anakku, manangihon podah, jadi kahou ma ho humbani hauhuron. [308]

²⁸Saksi paruhur jahat mapas do bani uhum, anjaha mantin do hagedukon bani pamangan ni halak parjahat.

²⁹Sirsir do uhum bani halak sipanrisai, sonai lonsing-lonsing bani gurung ni halak na oto. [309]