Read Batak Simalungun PODAH 20 Bible Online

PODAH 20 - Batak Simalungun bible

PODAH 20

¹Sipatubuh panrisaion do anggur, sibahen mabuk minuman koras, anjaha ise na sompat rebad-rebad ibahen, seng maruhur be. [310]

²Songon paraum ni singa do ondam-ondam ni raja, barang ise na mamuhoi ringisni, na parseda dirini sandiri do. [311]

³Hasangapon do ai bani dalahi mandaoh humbani paringoran, tapi halak na oto marosuh do martinggil.

⁴Halani borgoh ari, seng ra siparrayoh maninggala; sihol ma ia namin marpariama, hape aha pe lang adong. [312]

⁵Songon bah bagas do uhur ni jolma ibagas, tapi halak na pentar tardodousi do ai. [313]

⁶Buei do jolma patugah-tugahkon hadearonni, tapi halak hatengeran ni uhur, ija do jumpah ai?

⁷Marparlahou na pitah do halak parpintor; martuah do anakni i pudini. [314]

⁸Raja na hundul bani hotak paruhuman, mamurpurhon sagala hajahaton marhitei pangkawahni. [315]

⁹Ise ma na barani mangkatahon, “Domma hupaborsih uhurhu, pansing do ahu humbani dousangku?” [316]

¹⁰Timbangan na palegan-legan, suhat-suhat na palegan-legan, haduasi do ai hagigi bani Jahowa. [317]

¹¹Age marhitei pambahenanni, tartanda do dakdanak, atap na borsih atap na pintor biakni. [318]

¹²Pinggol na marpanangar pakon mata na marpangidah, Jahowa do na manjadihon ai haduasi. [319]

¹³Ulang ma harosuhkon na modom-modom, ase ulang miskin ho; ungkab ma matamu, gabe sungkupan sipanganon ma ho. [320]

¹⁴“Sambor do, sambor do,” nini sipamboli, hape dob misir ia, ipuji do dirini.

¹⁵Age adong omas, buei age mutiha, tapi arta siharganan ai ma bibir na marpambotoh. [321]

¹⁶Buat ma hiouni, ai ijamini do halak na legan, gadeihon ma ai, halani iampuni halak sileban. [322]

¹⁷Mantin do bani halak sipanganon na tinangko, hape dobni gabe gok ranggisgis do pamanganni. [323]

¹⁸Saud do sura-sura marhitei panriahan, halani ai marhitei partimbangan ma dalankon porang. [324]

¹⁹Halak na hujai-hujon pahata-hatahon, mambahen tarbotoh rusia, halani ai ulang ma marhuan pakon halak sihertep bibir. [325]

²⁰Halak na mamurai bapani atap inangni, sai na mintop do suluhni ibagas na golap marimpot-impot. [326]

²¹Tean-teanan na tarolos-olos ipatumpu, dobni seng marpasu-pasu ai. [327]

²²Ulang hatahon, “Hubalaskon ma hajahaton ai!” Hatengerhon ma Jahowa, sai urupan-Ni do ho. [328]

²³Hagigi ni Jahowa do timbangan na palegan-legan, anjaha kilo palsu seng dear ai. [329]

²⁴Jahowa do na manontuhon langkah-langkah ni jolma; naha ma jolma boi mangarusi dalanni? [330]

²⁵Siding do ai bani jolma, mapodastu mangkatahon bagah-bagah; hape dob ibagahkon pe ase iuhurhon ai. [331]

²⁶Mapurpur do halak parjahat ibahen raja na pantas, anjaha galapang do ipadalan hun datas ni sidea. [332]

²⁷Suluh ni Jahowa do tonduy ni jolma, na mamareksa haganup lompit-lompit ni uhurni. [333]

²⁸Halayakon ampa hasintongan do na manramotkon raja; anjaha totap do paratasni marhitei uhur holong. [334]

²⁹Hamuliaon bani garama, ai ma gogohni, tapi ubanni do hasangapon bani na matua. [335]

³⁰Lonsing-lonsing na mardaroh padaoh hajahaton, anjaha bogbog-bogbog paborsih uhur parbagas.