Read Batak Simalungun PODAH 21 Bible Online

PODAH 21 - Batak Simalungun bible

PODAH 21

¹Songon bah na bani bondar do uhur ni raja ibagas tangan ni Jahowa; ibobai do ai dompak ja rosuh ni uhur-Ni. [336]

²Haganup dalanni, pintor do ai ninuhur ni halak, tapi Jahowa do siuji uhur. [337]

³Na mandalankon hapintoron pakon uhum, rosuhan do uhur ni Jahowa bani ai humbani na mangidah galangan. [338]

⁴Mata na mangenjeng pakon uhur hagijangon, ai ma suluh bani parjahat, dousa do ai. [339]

⁵Uhur haponguton mambahen halak marlobih-lobih, tapi halak na tarolos-olos marhahurangan do. [340]

⁶Halak na patumpu arta marhitei sahap ladung, na marleilei logou anjaha na mangindahi hamatean do ai. [341]

⁷Panokohon ni halak parjahat, ai do na parseda sidea sandiri, ai manjua do sidea mangkorjahon hasintongan.

⁸Mareluk-eluk do dalan ni halak parjahat, tapi pintor do dalan ni halak siparuhur na pitah.

⁹Rahanan do marianan bani suhi-suhi ni tayub, ase rap marianan i rumah ampa naboru sipartinggil. [342]

¹⁰Uhur ni halak parjahat marosuh bani na masambor, gari hasomanni seng harga bani.

¹¹Anggo hona uhum sipanrisai, gabe maruhur do halak na oto, anggo iajari halak na pentar, jumpahan habotohon do ia. [343]

¹²Mangkawah do halak parpintor hu rumah ni parjahat; hona dabuh do parjahat ai hu hamagouan.

¹³Halak na manutup pinggolni dompak doruh-doruh ni halak na masombuh, ia pe, anggo dilo-dilo holi, seng dong na mambalosi.

¹⁴Sibere-bere na ponop pahombun ringis, anjaha siluah na buni mangampogi gila na parah. [344]

¹⁵Malas ni uhur bani halak parpintor, ai ma na mandalankon uhum; tapi habiaran do ai bani halak sihorjahon na masambor.

¹⁶Jolma na kahou humbani dalan hapentaran, bani urung habeguon do ia marianan. [345]

¹⁷Gabe marhahurangan do halak na marosuh marpesta-pesta, anjaha halak na rosuh bani anggur ampa minak, seng anjai bayak. [346]

¹⁸Tobus bani halak parpintor do halak parjahat, anjaha sipangosei-osei do gantih ni halak sibujur uhur. [347]

¹⁹Dearan do marianan i halimisan, ase rap sajabu pakon parinangon sipartinggil ampa sipargila-gila. [348]

²⁰Arta na maharga pakon minak, adong do i rumah ni halak na maruhur, tapi halak na bodoh mintor do iparbois-bois.

²¹Halak siparayak hapintoron pakon habasaron, dapotan hagoluhan ampa hamuliaon do.

²²Huta ni puanglima pe ipanangkih halak na pentar do, irumbakkon do benteng, hatengeran ni uhurni ai. [349]

²³Halak na manjaga pamanganni ampa dilahni, iramotkon do goluhni humbani parmaraan. [350]

²⁴Halak sigijang uhur ampa sipangenjeng, margoran do ai sipanrehei, tarlobih do jungkat ni parlahouni.

²⁵Hisap-hisap ni siparrayoh do hamatean bani, ai marayoh do tanganni marlahoan. [351]

²⁶Ganup ari do halak parjahat marsura-surai, tapi halak parpintor layak do, seng maruhur haut. [352]

²⁷Galangan ni halak parjahat, hagigi do ai, tarlobih anggo manggalang ia, hape laho mambahen na jahat do. [353]

²⁸Saksi parladung maningon magou do, tapi na sinahapkon ni na manangar totap do. [354]

²⁹Halak parjahat pajingar-jingar bohini, tapi anggo halak parpintor totap do parlangkahni.

³⁰Seng dong hapentaran, seng dong hauhuron, anjaha seng dong riah, na totap i lobei ni Jahowa. [355]

³¹Pinasirsir pe huda bani panorang porang, tapi anggo hamonangan humbani Jahowa do. [356]