Read Batak Simalungun PODAH 22 Bible Online

PODAH 22 - Batak Simalungun bible

PODAH 22

¹Harganan do goran na madear ase habayakon na buei, anjaha dearan do anggo gabe harosuh diri humbani pirak atap omas. [357]

²Saor do halak na bayak pakon na masombuh, tapi Jahowa do na manjadihon sidea haganup. [358]

³Halak na pantas mangidah parmaraan, jadi marponop ma ia; tapi halak na oto itoruskon do langkahni, gabe manaron. [359]

⁴Upah ni uhur na toruh ampa biar bani Jahowa, ai ma habayakon, hamuliaon ampa hagoluhan.

⁵Duri pakon siding do bani dalan ni halak pargeduk, halak na mangkargahon hosahni, ipadaoh ma dirini hunjai.

⁶Pasomal-somal ma dakdanak mardalan bani dalan sidalanonni, ia dob matua ia, seng manlembang ia hunjai. [360]

⁷Halak na bayak do na manrajai bani na masombuh, anjaha sipanginjam gabe jabolon ni na painjamkonsi.

⁸Halak na manabur hagedukon maningon sabionni do hamagouan, anjaha sai maripuk do tungkot hajungkatonni ai. [361]

⁹Halak na lamlam pangkawahni dapotan pasu-pasu do; ai ibere do humbani sipanganonni hubani na masombuh. [362]

¹⁰Usir siparrisai, jadi lang dong be paringoran, anjaha parsalisihan ampa panreheion pe maronti ma. [363]

¹¹Halak na mangkarosuhkon uhur na pitah, anjaha parsahapni pe basar, raja ma na gabe huan-kuanni. [364]

¹²Mata ni Jahowa do na manramotkon habotohon, tapi ibalikkon do hata ni sipangeluk.

¹³Hata ni siparrayoh, “Adong do singa i darat ai, ibunuh holi ahu i dalan ai!” [365]

¹⁴Godung na bagas do sahap-sahap ni naboru parbangkis, halak na pinapaan ni Jahowa do madabuh hujai. [366]

¹⁵Haotoon do longkot ibagas uhur ni dakdanak, tapi hotang sipangajari do palahohon ai hun bani. [367]

¹⁶Halak na mangodoh-odoh na masombuh laho paganda untungni, anjaha marsibere-bere bani halak na bayak, mambahensi marhahurangan.

¹⁷Paeleng ma pinggolmu anjaha tangihon ma hata ni halak na pentar anjaha paruhurhon ma podahku;

¹⁸ai dear do ai, anggo ra ho marimbagaskon ai, anjaha totap ai marianan bani bibirmu.

¹⁹Andohar martenger ni uhur ho bani Jahowa, ai do ase hupatugah ai bam sadari on, hubam tongon.

²⁰Ai lang domma husuratkon bam hata na maharga, podah pakon habotohon,

²¹laho paidahkon bam na sintong ampa na tongon, ase ibotoh ho sintong marbalos bani halak na marsuruh ho? [368]

²²Ulang ma rampas halak na masombuh, halani masombuh ia; anjaha ulang ma odoh-odoh halak na madoyuk i paruhuman; [369]

²³ai Jahowa do siparlulu bani sidea, anjaha Ia do na mambuat hosah ni sibuat hosah ni sidea. [370]

²⁴Ulang ra ho marhuan-kuan pakon halak siparringis, anjaha ulang ma saorhon dirimu bani halak pargila-gila, [371]

²⁵ase ulang gabe hasomalan ho bani parlahou ni sidea, anjaha itaon ho siding bani dirimu.

²⁶Ulang ma ra ho gabe halak sipanjamini, na ra mananggung pasal utang-utang, [372]

²⁷ai anggo seng dong panggalarmu, podomanmai ma holi ibuat humbam.

²⁸Ulang ma paosor batu parbalogan na dob pinasuk ni ompungmu hinan ijia. [373]

²⁹Halak na pongut bani horjani, boi do marhorja ia i lobei ni raja-raja; seng bani halak na malumat ia marugas. [374]