Read Batak Simalungun PODAH 24 Bible Online

PODAH 24 - Batak Simalungun bible

PODAH 24

¹Ulang ma simburu uhurmu mangidah halak parjahat, anjaha ulang ma ho ra saor pakon sidea; [392]

²ai hamagouan do iparanggi-ranggi sidea, anjaha na masambor do isahap-sahapkon bibirni. [393]

³Marhitei hapentaran do tarpajongjong rumah, anjaha marhitei panimbangion do totap ai;

⁴marhitei habotohon gok ma kamar-kamarni bani bagei-bagei ni arta na maharga anjaha na majenges. [394]

⁵Halak na maruhur do tongon na gogoh, anjaha na marpambotoh simada kuasa,

⁶ai marhitei pambobai na pentar tardalankon porang, anjaha marhitei buei ni sipanuturi dapot hamonangan. [395]

⁷Magijangtu do hapentaran bani halak na bodoh; bani partumpuan seng ongga mungkab pamanganni.

⁸Halak na paranggi-ranggi na masambor, targoran do ai kopala ni parjahat.

⁹Dousa do piningkiran ni halak na oto, anjaha halak sipanrisai, hagigi do bani jolma.

¹⁰Anggo seng tahan ho bani panorang hasosakan, ai ma tandani na hurang do gogohmu.

¹¹Sai paluah ma halak na sinarad hu hamatean, anjaha olat ma halak na itogu hu panayatan. [396]

¹²Anggo ihatahon ho, “Tonggor ma, seng ibagas botohnami ai,“ mintor ma nani lang ibotoh sipareksa uhur pasal ai? Siparorot tonduynima ibotoh do ai, anjaha ibaloskon do bani jolma domu hubani na binahenni. [397]

¹³Ale anakku, pangan ma manisan, ai dear do ai, sonai tobu-tobu ni huramah, ai mantin do ai bani langit-langitmu. [398]

¹⁴Sonai ma hapentaran ai bani tonduymu. Anggo jumpah ho ai, adong ma pangapudianan bam, seng soya-soya be pangarapanmu. [399]

¹⁵Ulang ma onggopi, ale parjahat, rumah ni halak parpintor, ulang ma parseda iananni!

¹⁶Ai pitu hali pe tompas halak parpintor, jongjong do ia use, tapi anggo halak parjahat, targompang do lanjar magou. [400]

¹⁷Ulang ho marsombuh-sombuh, anggo targompang munsuhmu, anjaha ulang megah uhurmu mangidah partompasni, [401]

¹⁸ai idahon ni Jahowa do ai, gabe sogam uhur-Ni, anjaha marbalik ringis-Ni humbani hubam.

¹⁹Ulang milas uhurmu ibagas bani halak sihorjahon na masambor, anjaha ulang ma ho marngotngot mangidah parjahat; [402]

²⁰ai bani halak parjahat, seng dong siarapkononkon, suluh ni halak parjahat maningon mintop do. [403]

²¹Ale, anakku, sai mabiar ma ho bani Jahowa ampa raja; ulang ma saor ho bani sipanggeori, [404]

²²ai sompong do sogop hamagouan bani sidea, anjaha na so niagak ni uhur do mangonai uhum bani sidea. [405]

²³On pe sahap ni halak na pentar do. Seng dear martonggor jumbak bani paruhuman. [406]

²⁴Halak na mangkatahon dompak parjahat, “Pintor do ho!” Hona papa do ia bahenon ni halak simbuei anjaha hona bura ibahen bangsa-bangsa. [407]

²⁵Tapi halak na maminsang sidea madear do, anjaha sogop do pasu-pasu ampa hatuahon bani sidea.

²⁶Summah-summah na mantin do parsampang na hona. [408]

²⁷Pungkah lobei horjamu i ladang, torsa bahen jumamu, dob ai pe ase marrumah tangga.

²⁸Ulang ra ho manaksihon na so sintong dompak hasomanmu, anjaha ulang marladung ho marhitei bibirmu. [409]

²⁹Ulang hatahon, “Sonai ibahen hu bangku, sonai do bahenonku bani. Baloskononku do hubani domu hubani na binahenni ai bangku.” [410]

³⁰Montas do ahu hun lambung ni juma ni halak parrayoh, hun lambung ni pohon anggur ni halak na hurang uhur.

³¹Tonggor ma, tubuhan suga-suga do haganupan ai, irungkub hupi-hupi do tanoh ai, anjaha mareong do tembokni.

³²Hukawahkon ma ai anjaha huparimbagaskon, huidah lanjar dapotan lumba-lumba ma ahu:

³³Tongkin nari modom, tongkin nari tibal-tibal, tongkin marlompit tangan; [411]

³⁴jadi roh ma bam hamiskinon songon panamun, anjaha hahurangan songon halak parsinjata. [412]