Read Batak Simalungun PODAH 25 Bible Online

PODAH 25 - Batak Simalungun bible

PODAH 25

¹On pe podah ni Raja Salomo, ai ma na pinahumpul ni juakjuak ni si Hiskia, raja ni Juda.

²Hamuliaon ni Naibata do ai mangadongkon rusia, tapi hamuliaon ni raja, ai ma na manulimati. [413]

³Gijang ni langit, bagas ni tanoh ampa pingkiran ni raja-raja seng tardodou ai.

⁴Iambukkon ma humbani pirak, jadi boi ma ai topaon ni tukang gabe parugas.

⁵Padaoh ma halak parjahat hun lobei-lobei ni raja, gabe totap ma paratasni marhitei hapintoron. [414]

⁶Ulang ma pabanggal-banggal dirimu i lobei ni raja, atap hundul ho bani ianan ni halak na sangap-sangap;

⁷ai rahanan do hatahonon ni halak bam, “Hu luluan ma ham!” Humbani na ipatoruh halak ho i lobei ni na sangap. [415]

⁸Na nididah ni matamu, ulang aduhon ai mapodastu, ai sonaha ma holi ho, anggo bador ho ibahen hasomanmu?

⁹Parkarahon parkaramu dompak hasomanmu, tapi ulang patugah rusia ni halak na legan, [416]

¹⁰ase ulang bador ho ibahen halak na manangar ai, gabe sambor baritamu lalab.

¹¹Doskon jambu omas na i atas ni pinggan pirak do, hata na niluarhon topat bani panorangni. [417]

¹²Doskon tintin omas atap ugas-ugas omas do, halak siparpodah na pentar bani halak na ra manangihon.

¹³Songon bah tubuh na patorsukkon bani musim sabion, sonai do suruhan hatengeran ni uhur bani na marsuruhsi, ipahisar do uhur ni tuanni.

¹⁴Songon hombun pakon logou na so marhasoman udan, sonai do halak na marbagah sibere-bere, hape seng ipasaud. [418]

¹⁵Marhitei hasabaron do dapot uhur ni na markuasa, anjaha hata na lamlam mamonggolhon holi-holi. [419]

¹⁶Anggo jumpah ho manisan, pangan ma ansa na porlu bam. ase ulang mabosurtu ho, gabe iutahkon ho ai.

¹⁷Ulang magatitu ho martandang hu rumah ni hasomanmu, ase ulang sobalan ia bam, gabe hagigini ho.

¹⁸Songon ompong-ompong, podang atap panah na marot, sonai do halak na manaksihon ladung dompak hasomanni. [420]

¹⁹Songon ipon na mulluk-ulluk atap nahei na tarlandit, sonai do halak na so hatengeran bani panorang hasosakan.

²⁰Songon halak na mananggali bajuni bani musim borgoh, anjaha songon na migar na mangonai bani ugah, sonai do halak na mandodingkon doding bani halak paruhur na seda.

²¹ Anggo loheian munsuhmu, bere ia mangan, anggo horahan ia, bere ia minum; [421]

²² ai na pajunjun narnar do ho bani uluni marhitei ai, anjaha Jahowa ma na mambalaskon ai bam.

²³Logou na hun utara paroh udan, tapi hata tundal mambahen bohi manringis.

²⁴Rahanan do marianan i suhi-suhi ni tayub, ase rap sajabu pakon parinangon partinggil-tinggil. [422]

²⁵Songon bah na torsuk hubani halak na horahan, sonai do barita na madear hun tanoh na madaoh.

²⁶Songon pansur na gombur atap bah tubuh na binutakan, sonai do halak parpintor, na mambahen parsangsian i lobei ni halak parjahat.

²⁷Seng dear panganon manisan mabueitu, halani ai asok ma mambere puji-pujian.

²⁸Songon huta na mareong, na so martembok be, sonai do halak na so boi manrajai dirini. [423]