Read Batak Simalungun PODAH 27 Bible Online

PODAH 27 - Batak Simalungun bible

PODAH 27

¹Ulang ma pangunsagahkon pasal ari patar, ai seng ibotoh ho atap aha na boi masa bani sada ari. [436]

²Halak na legan ma na mamuji ho, ulang ma pamanganmu sandiri, hasoman na lain ma, ulang bibir sandiri. [437]

³Borat pe batu, sonai homa horsik, tapi boratan do hunjai borit ni uhur marhalanihon ni halak na oto.

⁴Parah do gila, anjaha gajag do ringis, tapi ise ma na tolap manahan parsimburuon?

⁵Rahanan do pinsang-pinsang na talar, humbani holong na pinonop-ponop.

⁶Ugah halani lonsing-lonsing ni huan-kuan, holong do ai, tapi summah-summah ni halak pardomdom, sipakulah-kulah do. [438]

⁷Halak na bosur sobalan do age bani manisan, tapi halak na loheian matobu do bani age na mapaet.

⁸Songon manuk-manuk na manadingkon asarni, sonai do halak na manadingkon tanoh hatubuhanni. [439]

⁹Minak pakon rium-riuman do mambahen malas uhur, sonai homa do parhuan-kuanon, na marsipodah-podahan.

¹⁰Ulang tadingkon huan-kuanmu atap huan-kuan ni bapamu; anjaha ulang ma tandangi rumah ni saninamu sanggah tarsosak ho. Dearan do simbalog rumah na dohor, marimbang sanina na daoh. [440]

¹¹Maruhur ma, ale anakku, anjaha pamalas ma uhurhu, ase hubotoh marbalos bani na pahiri ahu.

¹²Halak na pantas mangidah parmaraan, jadi marponop ma ia, tapi halak na oto itoruskon do langkahni, gabe manaron. [441]

¹³Buat ma hiouni, halani ijamini do halak na legan, gadeihon ma ai, halani iampuni halak sileban. [442]

¹⁴Halak na mamuji-muji hasomanni marsora na maling, girah sogod homa, gabe bura-bura do ai hiraon. [443]

¹⁵Tiris na torus manektek bani musim udan, dos do ai ampa parinangon sipartinggil-tinggil; [444]

¹⁶halak na sihol manjolomisi, doskon na manahan logou do ai, atap na manjolom minak marhitei tangan siamunni.

¹⁷Bosi do pamarot bosi, sonai do jolma marsipadearan samah jolma.

¹⁸Halak sipiara hayu ara, panganonni do buahni, anjaha halak sipambalosi bani tuanni, dapotan puji-pujian do.

¹⁹Songon bah mansorminkon bohini bani jolma, sonai do uhur ai mansorminkon hadirion ni jolma ai bani dirini.

²⁰Nagori toruh ampa urung habeguon seng marnabosur, sonai do mata ni jolma seng marnabosur. [445]

²¹Balanga panlalaan pangujian bani pirak, liang panloburan manguji omas, tapi sada halak baritani do pangujian bani.

²²Porini pe hona duda halak na oto ibagas losung rap pakon omei, tapi seng ra sirang haotoonni ai hun bani.

²³Pangkei ma botoh haadongan ni biribirimu, anjaha pardiateihon ma hulananmu,

²⁴ai seng manongtong habayakon lalab, anjaha seng totap hadoharon marsundut-sundut. [446]

²⁵Anggo martubuhan ma poyon-poyon ai, martumbor simaratah, anjaha ipatumpu hun dolog-dolog suan-suanan,

²⁶pasirsiron ni biribiri ai ma bam parhiouon ampa pamboli ni juma humbani hambing ai;

²⁷sungkup homa dadih bahen sipanganonmu, sipanganon bani parrumahmu ampa hagoluhan bani jabolonmu.