Read Batak Simalungun PODAH 28 Bible Online

PODAH 28 - Batak Simalungun bible

PODAH 28

¹Maporus do halak parjahat age pe seng dong na mardakdaksi, tapi anggo halak parpintor marnalom ni uhur do songon anak ni singa. [447]

²Anggo masa hajahaton bani sada nagori, pagantih pasoluk ma rajani, tapi marhitei sada halak na maruhur anjaha na marpambotoh totap do mardalan uhum.

³Halak na sangap, na mangodoh-odoh halak na masombuh, songon udan doras, na mangayubkon do ai, siparseda gogoh ni tanoh.

⁴Halak sitadingkon uhum mamuji-muji halak parjahat, tapi halak sidalankon uhum ilawan do sidea. [448]

⁵Halak parjahat seng iarusi aha hasintongan, tapi halak sipindahi Jahowa iartihon do haganupan ai.

⁶Dearan do halak na masombuh, na pitah marparlahou humbani halak na so pintor langkahni, age pe bayak ia. [449]

⁷Halak siramotkon titah, ai ma anak na pantas maruhur, tapi halak na marhuankon siparhisap, pabador bapani do. [450]

⁸Halak na pabuei artani marhitei bunga ni duit ampa untung na malobihtu, bani halak sihaholongi na miskin do arta ipatumpuni ai. [451]

⁹Halak na padaohkon pinggolni humbani na manangihon titah, tonggoni ai pe gabe hagigi do. [452]

¹⁰Halak na pakahouhon sibujur uhur hubani dalan hamagouan, hubagas godungni sandiri do ia madabuh; tapi halak sipitah maruhur, na dear do teanonni. [453]

¹¹Halak na bayak, pentar do ia ninuhurni, tapi halak na miskin siparuhur, tardapotsi do uhurni ai.

¹²Anggo marhamonangan halak parpintor, banggal ma hatuahon, tapi anggo markuasa halak parjahat, marponop bei ma jolma. [454]

¹³ Barang ise na manrongkob panlanggaronni seng martuah ai, tapi halak na mansopotkon salahni anjaha itadingkon ai, dapotan idop ni uhur do. [455]

¹⁴Martuah ma halak na tongtong marhabiaran bani Jahowa, tapi na pahengkeng uhurni madabuh do hubagas hamagouan. [456]

¹⁵Songon singa na maraum pakon gipul na loheian, sonai do panrajai na jahat bani rayat na miskin.

¹⁶Raja na hurang uhur, ai do sidalankon odoh-odoh, tapi sihagigihon untung na so sintong, paganjang ari-arini do ai.

¹⁷Halak na hona sapata ni daroh ni jolma, mompas-ompas do ia ronsi matei, ulang iurupi be ia. [457]

¹⁸Halak na so panurakon marpalahou, sai na maluah do, tapi halak na lekluk marparlahou sai madabuh do hubagas godung. [458]

¹⁹Halak sihorjahon jumani bosuran do ia bani sipanganon, tapi halak sipindahi na so marguna, bosuran do ia bani hamiskinon.

²⁰Halak hatengeran, buei do pasu-pasu dapotsi, tapi halak na tarolos sihol bayak, seng anjai lang hona uhum. [459]

²¹Seng dear mambuat-buat uhur; halani sipanganon sampohul pe, ra do halak sipata mandalankon hajahaton. [460]

²²Parmata na mangapian, oji do uhurni bayak, tapi seng dapot uhurni hamiskinon do sogop bani. [461]

²³Halak na ra maminsang hasomanni, puji-pujian do ujungni dapotsi, lobih humbani halak na palemes-lemes parsahapni.

²⁴Halak na manangkoi bapani atap inangni anjaha ihatahon homani, “Seng dousa ai!” Dos do ai pakon halak sipanamun. [462]

²⁵Halak paruhur haut, patubuh paringoran, tapi halak na martenger ni uhur bani Jahowa marlobih-lobih do. [463]

²⁶Halak na martenger ni uhur bani pingkiranni sandiri, na oto do ai, tapi halak na pantas marparlahou, sai maluah do. [464]

²⁷Halak parlayak bani na masombuh, seng anjai hurangan, tapi halak na papitpit matani, buei do bura-bura mangonai bani. [465]

²⁸Anggo markuasa halak parjahat, marponop bei ma jolma, tapi anggo masab sidea, lambin tambah ma halak parpintor.