Read Batak Simalungun PODAH 29 Bible Online

PODAH 29 - Batak Simalungun bible

PODAH 29

¹Halak na gati hona paingat, hape tong ipahengkeng uhurni, sompong do holi maripuk ai, seng hatambaran. [466]

²Anggo halak parpintor siparkuasa, marolob-olob ma rayat; tapi anggo halak parjahat manrajai, mangorong ma halak. [467]

³Halak na mangkaholongi hapentaran, pamalas uhur ni bapani, tapi halak na marsaor ampa boru jalang, mambois-boiskon sinari do. [468]

⁴Marhiteihon habonaron do tarpatotap raja sada nagori, tapi na paporsankon balasting maparahtu, ai do na parsedahon. [469]

⁵Halak na mamuji-muji hasomanni, na manaon jarot do ia ai i lobei ni naheini.

⁶Marhitei hajahatonni do halak parjahat hona siding, tapi anggo halak parpintor marolob-olob anjaha marmalas ni uhur do.

⁷Iparuhurhon halak parpintor do hak ni halak na masombuh, tapi anggo halak parjahat seng ipardulihon ai.

⁸Halak sipanrisai mambahen geor huta, tapi mandaoh do ringis ibahen halak siparuhur. [470]

⁹Anggo marparkara halak na pentar ampa halak na oto, manggila anjaha tartawai do halak na oto ai, seng lalab marhadoban.

¹⁰Halak siuseihon daroh magigi do ia bani halak na daulat, tapi halak parpintor mangindahi dalan pagoluhkonsi.

¹¹Halak na oto ipapuas do ganup ringisni, tapi anggo halak na maruhur itahan do ai. [471]

¹²Anggo ra sipanrajai manangihon hata ladung, haganup gamot-gamotni gabe jahat ma.

¹³Saor do halak na masombuh ampa sipangodoh-odoh, tapi Jahowa do sibere haliharon bani mata ni sidea bei. [472]

¹⁴Raja na manguhumi halak na masombuh ibagas hasintongan, totap do paratasni lalab. [473]

¹⁵Hotang ampa pangajaran do parohkon hapentaran, tapi dakdanak na tinurutan parohkon habadoron bani inangni. [474]

¹⁶Anggo martambah halak parjahat, lambin buei ma hajahaton; tapi idahon ni halak parpintor do pardabuh ni sidea. [475]

¹⁷Ajar ma anakmu, jadi sonang ma ho bahenonni, anjaha ibere sipamalas uhur. [476]

¹⁸Anggo seng dong pangungkabon, geor do bangsa; martuah do halak na mandalankon titah ni Naibata.

¹⁹Marhitei hata tumang seng tarajari jabolon, age pe ibotoh, seng idalankon.

²⁰Anggo ididah ho halak na hertep marsahap, bueinan ope pangarapan bani halak na bodoh ase bani. [477]

²¹Halak na maunjahtu bani jabolonni humbani haetek-etekkonni nari, dobni manlawan do ai.

²²Halak pargila-gila patubuh paringoran, anjaha halak parringis mangkorjahon buei dousa. [478]

²³Gijang ni uhurni do patoruh halak, tapi halak sitoruh uhur dapotan hasangapon do. [479]

²⁴Halak na saparbagianan pakon panangko, parseda dirini do, itangar do namin sipamurai, tapi ipasip-sip do. [480]

²⁵Biar dompak jolma mambahen hona siding, tapi hona ondingan do na martenger ni uhur bani Jahowa.

²⁶Buei do halak na mambuat-buat uhur ni sipanrajai, tapi Jahowa do na mamintori ganup halak. [481]

²⁷Hagigi do halak pargeduk bani halak parpintor, tapi halak na pintor parlahouni, hagigi do ai bani halak parjahat.