Read Batak Simalungun PODAH 3 Bible Online

PODAH 3 - Batak Simalungun bible

PODAH 3

¹Ale anakku, ulang ma ho lupa bani podahku, sai paruhurhon ma parentahku,

²ai tambahkononni do bam ari na madear, umur na ganjang ampa hadoharon na gok. [24]

³Holong ampa hasintongan ulang ma laho humbam, parsinongkok ma ai anjaha suratkon ma bani atei-ateimu. [25]

⁴Jadi dapotan idop ni uhur ma ho ampa na madear i lobei ni Naibata ampa jolma. [26]

⁵ Tenger ma uhurmu bani Jahowa humbani gok ni uhurmu, ulang ma ho marpangunsandeian bani pingkiranmu sandiri. [27]

⁶ Bani haganup dalanmu ingat ma Ia, jadi Ia ma papintor dalanmu.

⁷Ulang na dob maruhur ho ninuhurmu, habiari ma Jahowa, anjaha padaoh dirimu humbani hajahaton. [28]

⁸Gabe tambar ma ai bani dagingmu, anjaha hahisaron bani holi-holimu. [29]

⁹Pasangap ma Jahowa marhitei habayakonmu ampa marhitei limbuah ni sagala pansarianmu; [30]

¹⁰jadi gok ma tuanganmu bani gandum, anjaha sampur kilangmu ibahen anggur.

¹¹ Ale anakku, ulang ma mapas uhurmu bani pangajarion ni Jahowa, anjaha ulang sogam uhurmu bani uhuman-Ni. [31]

¹² Ai hinaholongan-Ni do ipinsang Jahowa songon bapa dompak anak, na hinarosuhkon ni uhur-Ni. [32]

¹³Martuah do jolma na dapotan hapentaran, ampa jolma na jumpahan pangarusion, [33]

¹⁴ai na mandapot ai dearan do ai humbani na mandapot pirak, harganan do ai humbani omas. [34]

¹⁵Harganan do ai ase mutiha, anjaha sagala na hinarosuhkonmu seng taratasisi ai. [35]

¹⁶Umur na ganjang do bani tangan siamunni, bani tangan sambilouni habayakon pakon hamuliaon. [36]

¹⁷Dalanni, ai ma dalan harosuh, anjaha damei do sagala nilangkahkonni.

¹⁸Hayu hagoluhan do ai bani halak na jumpahan ai, anjaha martuah do halak, na manjolomsi. [37]

¹⁹Jahowa do na pajonam dunia on marhitei hapentaran; langit ai marhitei uhur panimbangion. [38]

²⁰Marhitei habotohonni mapultak luhung ni laut, anjaha hombun manektekkon namur. [39]

²¹Ale anakku, ulang magou ai humbani panonggormu; ramotkon ma hauhuron ampa partimbangon,

²²ase gabe hagoluhan ai bani tonduymu, anjaha hajagaron bani borgokmu. [40]

²³Gabe sonang ma ho bani dalanmu, anjaha naheimu seng anjai tarantuk. [41]

²⁴Bani na hundul ho seng anjai songgotan, anggo ipatibal ho dirimu, sonang do parpodommu. [42]

²⁵Ulang pala rusak ho halani songgot-songgot na sompong parrohni, atap halani hamagouan na mangonai bani halak parjahat;

²⁶ai Jahowa do hatengeran ni uhur bam, ramotkonon-Ni do naheimu humbani jarot. [43]

²⁷Ulang ma ho manjua mambahen na madear bani halak na hurangan, anggo tuk do gogohmu mandalankon ai. [44]

²⁸Ulang ma hatahon bani hasomanmu, “Laho ma, sahali nari ma ho roh, patar pe hubere, hape adong do bam.” [45]

²⁹Ulang ma uhurhon na jahat dompak hasomanmu, na marianan martenger ni uhur rap pakon ho.

³⁰Ulang ho marsalisih dompak halak seng marhala, anggo seng dong ibahen na jahat bam.

³¹Ulang ma ho simburu bani halak sipangodoh-odoh anjaha ulang ma ihutkon dalanni;

³²ai hagigi do halak sipanlawan bani Jahowa, tapi saor do Ia bani halak parpintor. [46]

³³Papa ni Jahowa do mangonai bani rumah ni parjahat, tapi ianan ni parpintor ipasu-pasu-Si do.

³⁴Halak na pahiri-hirihon ipahiri do, tapi maidop do uhur-Ni bani halak sitoruh uhur. [47]

³⁵Hamuliaon do siteanon bani halak siparuhur, tapi habadoron do parbagianan ni halak na oto.